Profesionistët shëndetësorë kanë shprehur zhgënjimin dhe indinjatën e tyre ndaj Ministrisë së Shëndetësisë, pasi kjo e fundit ua ka anuluar takimin që ishte caktuar nga vetë institucioni, shkruan Gazeta Infokus.

Besfort Racaj, përmes një reagimi publik, ka bërë të ditur se kanë pranuar një email nga Ministria e Shëndetësisë, përmes të cilit janë njoftuar për anulimin e takimit.

Sipas tij, ky veprim dëshmon mungesën e vullnetit institucional për t’i dëgjuar kërkesat e profesionistëve shëndetësorë që po përballen me papunësi dhe mungesë perspektive.

-Advertisement-

“Përmes këtij anulimi, morëm edhe një mesazh të qartë: Ministria e Shëndetësisë nuk po gjen kohë për ta dëgjuar zërin tonë!”, ka deklaruar Racaj.

Ai ka theksuar se, pavarësisht kërkesave të vazhdueshme për dialog, institucionet nuk kanë treguar gatishmëri të mjaftueshme për t’i adresuar shqetësimet e tyre.

Racaj ka bërë të ditur se fillimisht kishin kërkuar takim me kryeministrin, por më pas kishin pranuar të takoheshin vetëm me ministrin e Shëndetësisë. Megjithatë, edhe ky takim është anuluar.

Për këtë arsye, profesionistët shëndetësorë kanë vendosur që e hëna të jetë afati i fundit për dialog, duke paralajmëruar organizimin e protestave nëse nuk realizohet takimi.

“Deri të hënën presim konfirmimin dhe mbajtjen e takimit! Nëse deri atëherë nuk do të ketë takim, do të pasojë protesta!”, ka paralajmëruar ai.

Në reagimin e tij, Racaj ka theksuar se kërkesat e tyre nuk lidhen me privilegje apo interesa personale, por me të drejtën për punë dhe mundësinë për t’i shërbyer sistemit shëndetësor të Kosovës.

“Nuk kemi sakrifikuar rininë për të mbetur të papunë, të papërkrahur dhe pa perspektivë. Kemi zgjedhur këtë profesion për të shëruar, për të shpëtuar jetë dhe për të qenë në shërbim të qytetarëve tanë, të cilët presin me muaj e vite të tëra për të marrë shërbime mjekësore”, ka shkruar Racaj.

Ai ka kërkuar nga institucionet që të krijojnë mundësi punësimi dhe të trajtojnë me dinjitet profesionistët shëndetësorë, duke theksuar se mungesa e perspektivës po i detyron ata të mendojnë për forma të tjera të reagimit.

“Mos na detyroni të dalim në rrugë për të kërkuar atë që duhet të na garantohet: të drejtën për të punuar dhe për t’i shërbyer vendit tonë!”, ka përfunduar Racaj.

Deri më tani, në reagimin e publikuar nuk është bërë e ditur ndonjë datë konkrete për mbajtjen e protestës, në rast se takimi nuk realizohet brenda afatit të paralajmëruar./Gazeta Infokus/

Udhëto Oslo – Prishtinë çdo javë me PrishtinaTickets

Sponsoruar

-Advertisement-