Lajme

Bajrami – LVV-së: Raporti i BE-së s’evidenton asnjë të arritur, ju dilni flisni për progresin që paska bërë Kosova në integrim evropian

Autori: Gazeta inFokus 14:07 | 11 November 2026

Deputetja e Lidhjes Demokratike të Kosovës, Hykmete Bajrami tha gjatë debatit të sotëm parlamentar për raportin e sivjetmë të Bashkimit Europian për Kosovën se ai nuk konstaton “asnjë progres në as edhe një fushë të vetme”.

Bajrami tha se kur dëgjoi fjalimin e deputetes së LVV-së, Liza Gashi – e cila foli në emër të grupit parlamentar të kësaj partie – pati përshtypjen e një “bote paralele”.

“Kur dëgjova fjalimin e përfaqësueses së Lëvizjes Vetëvendosje, me të vërtetë pata përshtypjen që po jetojmë në një botë paralele. Të nderuar kolegë deputetë, për 960 ditë, Kosova nën qeverisjen e Lëvizjes Vetëvendosje ka qenë nën masa ndëshkuese të Bashkësisë Evropiane”, tha ajo.

-Advertisement-

“A e dini se cila është kostoja e këtyre masave? Dhe sot keni fytyrë të dilni në Kuvendin e Republikës së Kosovës dhe të na flisni për progresin në integrim evropian që Kosova ka bërë nën qeverisjen tuaj”, shtoi Bajrami.

Ajo tha se vetëm masat ndëshkuese të BE-së kanë pasur kosto të madhe për vendin.

“Një raport i GAP-it ka vlerësuar se kostoja vetëm financiare e masave ndëshkuese të BE-së është 613 milionë euro. Por kjo kosto është jashtëzakonisht më e madhe”, tha ajo.