Lajme

Të akuzuarit për sulmin në Ibër-Lepenc deklarohen sërish të pafajshëm

Autori: Gazeta inFokus 14:00 | 11 November 2026

Të akuzuarit Jovan dhe Dragisha Viqentijeviq, si dhe Igor Dimoviq, janë deklaruar sërish të pafajshëm për sulmin terrorist në kanalin e Ibër-Lepencit.

Në Gjykatën Themelore në Prishtinë, në Departamentin Special, është mbajtur seanca e radhës me përbërje të re të trupit gjykues, pas pensionimit të gjyqtarit Vesel Ismaili.

Kryetar i trupit gjykues tash është gjyqtari Leon Përlska, ndërsa anëtarë janë Lutfi Shala, i cili është anëtar i ri i trupit gjykues, dhe Kujtim Krasniqi.

-Advertisement-

Palët kanë vlerësuar se nuk ka nevojë që aktakuza të lexohet sërish, ndërsa të tre të akuzuarit janë deklaruar të pafajshëm edhe në këtë seancë.

Më pas, procedura ka vazhduar me fjalët hyrëse.

Prokurori Bekim Kodraliu ka deklaruar se mbetet prapa fjalës hyrëse të dhënë më herët, ndërsa të njëjtin qëndrim e kanë mbajtur edhe palët e tjera, duke iu referuar fjalëve hyrëse të dhëna më 9 korrik.

I akuzuari Igor Dimoviq nuk është në paraburgim, ndryshe nga vëllezërit Viqentijeviq.

Shpërthimin në kanalin e ujit të “Ibër-Lepencit” në fshatin Varagë të Zubin-Potokut në nëntor të vitit 2024, i cili dyshohet se u bë me rreth 20 kilogramë eksplozivë, autoritetet e Kosovës e kanë cilësuar si sulm terrorist, kurse Serbinë e kanë bërë përgjegjëse për të.