Dhjetëra supermarkete në disa vende evropiane janë përballur me probleme në sistemet e ftohjes, duke shkaktuar dëmtimin e produkteve ushqimore dhe humbje financiare.

Një valë e re sulmesh të dyshuara kibernetike ka goditur sistemet e ftohjes në dhjetëra supermarkete në disa vende evropiane, duke bërë që temperaturat e frigoriferëve dhe ngrirësve të rriten në mënyrë të papritur, përcjell albinfo.ch.

Incidentet janë raportuar të hënën, më 2 nëntor, në Belgjikë, Suedi, Luksemburg, Irlandë dhe Estoni, ndërsa probleme të ngjashme janë evidentuar edhe në vende të tjera evropiane.

-Advertisement-

Në disa raste, temperaturat e pajisjeve frigoriferike kanë arritur deri në 50 gradë Celsius, duke detyruar supermarketet të largojnë ose të asgjësojnë produkte ushqimore që nuk mund të ruheshin më në kushte të sigurta.

Në Belgjikë, rrjeti Delhaize ka konfirmuar se rreth 40 dyqane janë prekur nga një incident informatik, ndërsa Carrefour ka raportuar probleme në 15 pika shitjeje.

Probleme të ngjashme janë shfaqur edhe në Suedi, ku rrjetet ICA dhe Coop kanë raportuar rritje të pazakonta të temperaturave në sistemet e ftohjes.

Në Irlandë, rrjeti SuperValu ka njoftuar se 13 dyqane janë prekur nga një incident kibernetik që lidhet me një model të caktuar të sistemeve frigoriferike.

Sipas raportimeve, në disa raste personat e dyshuar kanë ndërhyrë nga distanca në sistemet elektronike, duke ndryshuar parametrat e temperaturës ose duke aktivizuar funksionin e shkrirjes së akullit.

Autoritetet belge kanë nisur hetimet për të përcaktuar shkakun dhe përgjegjësit e incidenteve.

Kjo nuk është hera e parë që sistemet frigoriferike të supermarketeve bëhen objektiv i sulmeve kibernetike.

Në tetor, qindra supermarkete në Francë u përballën me probleme të ngjashme, kur persona të paautorizuar ndërhynë në sistemet e kontrollit të temperaturës, duke shkaktuar dëmtimin e sasive të mëdha të ushqimeve dhe humbje financiare.

Incidentet e fundit kanë ngritur shqetësime për sigurinë e pajisjeve të lidhura me internetin, veçanërisht të sistemeve që kontrollojnë ruajtjen e produkteve ushqimore.

Deri tani, nuk është konfirmuar nëse incidentet në vendet e ndryshme evropiane janë të lidhura me njëri-tjetrin dhe as kush qëndron pas tyre.

Udhëto nga Suedia drejt Kosovës me PrishtinaTickets

Sponsoruar

-Advertisement-