Lajme

Supremja shfuqizon vendimin e Sveçlës: Patentë-shoferët nuk mund të mbahen nga Policia më shumë se tetë ditë

Autori: Gazeta inFokus 11:42 | 30 October 2026

Gjykata Supreme e Kosovës ka shpallur të paligjshëm dhe ka shfuqizuar paragrafin 3 të nenit 17 të Udhëzimit Administrativ për Procedurat e Kundërvajtjes, i cili parashihte që patentë-shoferi t’i kthehej qytetarit vetëm pas përfundimit të masës mbrojtëse të ndalimit të drejtimit të automjetit.

Ky vendim është marrë pas padisë së paraqitur nga 28 paditës kundër Ministrisë së Punëve të Brendshme dhe Policisë së Kosovës, të cilët kishin kërkuar shfuqizimin e pjesshëm të këtij udhëzimi administrativ.

Në arsyetimin e vendimit, Gjykata Supreme ka sqaruar se mbajtja e përkohshme e patentë-shoferit nga Policia dhe masa mbrojtëse që ndalon drejtimin e automjetit janë dy çështje të ndryshme juridike, të cilat nuk mund të trajtohen si e njëjta masë.

-Advertisement-

Sipas nenit 244 të Ligjit për Rregullat e Trafikut Rrugor, Policia ka të drejtë ta mbajë përkohësisht patentë-shoferin, por jo më gjatë se tetë ditë.

Për rrjedhojë, Gjykata ka konstatuar se mbajtja e dokumentit deri në përfundimin e masës mbrojtëse, e cila mund të zgjasë tre, gjashtë apo edhe dymbëdhjetë muaj, bie ndesh me dispozitat ligjore.

Supremja ka theksuar se përmes një akti nënligjor nuk mund të zgjerohen kompetencat që përcaktohen me ligj dhe as të vendosen kufizime shtesë për qytetarët pa bazë ligjore.

Vendimi bën dallimin mes kthimit fizik të patentë-shoferit dhe të drejtës për të drejtuar automjetin. Kthimi i dokumentit nuk nënkupton se qytetari mund të drejtojë automjetin gjatë kohës kur ndaj tij është ende në fuqi masa e ndalimit./Gazeta Infokus 

Comodita Home rikthen “Garage Sale” për edicionin e tetë, me zbritje deri në 70%
-Advertisement-

T� tjera

Fokusi

lajme

Ky website përdor cookies. Duke vazhduar përdorimin, ju pranoni përdorimin e tyre.

Privacy policy