Partia Demokratike e Kosovës ka kërkuar përshpejtimin e procedurave për Projektligjin për ndryshimin dhe plotësimin e Ligjit për Dhomat e Specializuara, me synimin që shqyrtimi i tij të vazhdojë sot dhe votimi të bëhet nga ora 17:30.

Kërkesën e paraqiti deputeti i PDK-së, Arian Tahiri, i cili kërkoi mbështetjen e grupeve parlamentare për një mocion procedural që do të mundësonte shmangien e afateve të përcaktuara me Rregulloren e Kuvendit.

“Sot është ditë shumë e rëndësishme, jam mirënjohës për votën e secilit deputet për Ligjin për Dhomat e Specializuara. Mirëpo, duke pasur parasysh që është edhe kohë urgjente edhe moment i rëndësishëm, në emër të grupit të PDK-së parashtroj mocionin procedural për shmangie të afateve të përcaktuara në Nenin 76 të Rregullores së Kuvendit për shqyrtimin e këtij projektligji”, tha Tahiri.

-Advertisement-

Ai propozoi që amendamentet për projektligjin t’i adresohen Komisionit për Legjislacion sot në orën 15:30, në mënyrë që procedurat të vazhdojnë brenda ditës.

Ndaj kësaj kërkese reagoi kryetarja e Kuvendit dhe ushtruesja e detyrës së presidentit, Albulena Haxhiu. Ajo tha se mocione të tilla nuk parashtrohen ndërmjet pikave të rendit të ditës dhe përmendi një dakordim paraprak ndërmjet përfaqësuesve të VV-së dhe PDK-së.

“Vetëm po ju njoftoj që kështu midis pikave të rendit të ditës nuk bëhen mocionet, ky është rregull që në vazhdimësi e kemi zbatuar. Për shkak të respektit ua kalova fjalën, por nuk është në rregull që të ndërhyni midis pikave të rendit të ditës”, tha Haxhiu.

Ajo deklaroi se pas një takimi ndërmjet drejtuesve të VV-së dhe PDK-së ishte paraparë që të arrihej një dakordim për mënyrën e procedimit të çështjes.

Haxhiu e lidhi diskutimin edhe me procesin për zgjedhjen e presidentit, duke thënë se është e rëndësishme që partitë të arrijnë marrëveshje dhe vendi të mos shkojë në zgjedhje për shkak të këtij procesi.

Ajo kritikoi gjithashtu mënyrën e procedimit të mocionit, duke thënë se me veprime të tilla po luhet me ndjenjat e protestuesve që po qëndrojnë para Kuvendit.

“UÇK-në nuk mund ta mbrojë vetëm PDK-ja”, deklaroi Haxhiu.

Udhëto Oslo – Prishtinë çdo javë me PrishtinaTickets

Sponsoruar

-Advertisement-