Ehat Miftaraj nga Instituti i Kosovës për Drejtësi ka paralajmëruar se Kosova mund të përballet me një situatë të paprecedentë institucionale nëse Kuvendi nuk arrin ta zgjedhë Presidentin e Republikës.

Në një postim, Miftaraj ka thënë se mandati i Ushtruesit të Detyrës së Presidentit përfundon më 4 tetor 2026 dhe se, sipas interpretimit të tij të Kushtetutës dhe jurisprudencës së Gjykatës Kushtetuese, pas kësaj date funksioni nuk mund të ushtrohet më në këtë formë.

Kushtetuta përcakton se posti i ushtruesit të detyrës së Presidentit nuk mund të ushtrohet për një periudhë më të gjatë se gjashtë muaj.

-Advertisement-

“Nëse kjo legjislaturë dështon me zgjedh Presidentin, Republika e Kosovës për herë të parë në historinë e saj të re nga shpallja e pavarësisë do të mbetej pa President dhe pa Ushtrues të Detyrës së Presidentit”, ka shkruar Miftaraj.

Ai ka paralajmëruar se më 5 tetor vendi mund të zgjohet pa një nga pozitat kryesore kushtetuese të shtetit.

“Kur të zgjohemi të hënën në mëngjes më 5 tetor, nuk do të kemi një ndër pozitat kryesore të shtetit që garanton funksionimin demokratik të institucioneve kushtetuese dhe që do t’i ushtronte kompetencat dhe përgjegjësitë e përcaktuara me Kushtetutë dhe ligj”, ka shkruar ai.

Sipas Miftarajt, një situatë e tillë do të krijonte “vakum institucional” dhe do të cenonte funksionimin kushtetues dhe demokratik të institucioneve.

Ai ka kritikuar gjithashtu klasën politike, duke thënë se ditët e fundit po dëshmojnë mungesë të lidershipit shtetëror dhe të aftësisë për kompromis politik.

“Këto ditë kritike na dëshmojnë se kalkulimet dhe interesat personale dhe partiake dominojnë agjendën politike”, ka përfunduar Miftaraj.

Gjykata Kushtetuese, në aktgjykimin e publikuar më 25 mars 2026, kishte përcaktuar afatin për procedurën e zgjedhjes së Presidentit dhe kishte konstatuar se, në rast dështimi për zgjedhjen e tij brenda afatit të përcaktuar, Kuvendi shpërndahet sipas Kushtetutës dhe zgjedhjet e parakohshme parlamentare duhet të zhvillohen brenda 45 ditësh./GazetaInfokus

Udhëto Oslo – Prishtinë çdo javë me PrishtinaTickets

Sponsoruar

-Advertisement-