Lajme

Lushtaku përkujton Fehmi dhe Xhevë Lladrovcin: Lavdi e përjetshme dëshmorëve të lirisë!

Autori: Gazeta inFokus 10:20 | 22 September 2026

Në 28-vjetorin e rënies së heroit të kombit, Fehmi Lladrovci, Sami Lushtaku ka përkujtuar me nderim dhe krenari komandantin e Brigadës 114, bashkëshorten e tij, heroinën Xhevë Lladrovci, si dhe luftëtaren Fatime Hetemi.

Lushtaku, përmes një postimi, ka vlerësuar figurën e Fehmi Lladrovcit si intelektual, patriot dhe luftëtar të paepur të çështjes kombëtare.

“Feha ishte burrë i idealeve të mëdha, trim i rrallë dhe vizionar i çështjes kombëtare. Ai nuk u mjaftua vetëm me ëndrrën për liri. Ai ia kushtoi jetën organizimit, sakrificës dhe luftës për ta bërë atë realitet”, ka shkruar Lushtaku.

-Advertisement-

Ai ka theksuar se pas kthimit nga mërgimi, Lladrovci u angazhua në organizimin dhe drejtimin e luftës, duke udhëhequr Brigadën 114 të Zonës së Drenicës deri në ditën e rënies.

Më 22 shtator 1998, gjatë ofensivës së forcave serbe në Drenicë, Fehmi Lladrovci ra në pikën e Gradinës në Gllanasellë, krah për krah me bashkëshorten e tij, Xhevë Lladrovcin, dhe luftëtaren Fatime Hetemi.

Lushtaku ka shprehur nderimin për të gjithë ata që ranë gjatë luftës për lirinë e Kosovës.

“Lavdi e përjetshme Fehmi e Xhevë Lladrovcit, Fatime Hetemit dhe të gjithë dëshmorëve që dhanë më të shtrenjtën për lirinë e Kosovës!”, ka shkruar ai.