Përgatitjet për edicionin e sivjetmë të Sunny Hill Festival, i cili do të mbahet më 31 korrik, 1 dhe 2 gusht, janë në fazën përfundimtare.

I ftuar në podcastin e gazetarit Shkelzen Dakaj, Alban Kastrati nga Sunny Hill, ka ndarë detaje rreth organizimit të festivalit më të madh muzikor në Kosovë, duke treguar se puna për një edicion nuk zgjat vetëm disa muaj, por zhvillohet gjatë gjithë vitit.

Kastrati tha se, ndryshe nga vitet e para kur festivali nisi si një projekt i ndërtuar mbi pasionin, sot ai është shndërruar në një platformë serioze me organizim të vazhdueshëm.

-Advertisement-

“Edicioni i këtij viti po shkon shumë mirë. Përgatitjet po ecin sipas planit, sepse është bërë punë dymbëdhjetëmujore. Në fillim ishte një projekt i pasionit tonë të përbashkët për të sjellë diçka interesante gjatë verës, por me kalimin e viteve e pamë që festivali po i tejkalonte pritjet tona dhe puna u bë shumë më serioze”, u shpreh ai.

Sipas Kastratit, sapo përfundon një edicion, nis menjëherë puna për organizimin e atij pasues.

“Në momentin që hiqen skenat nga ambienti i festivalit, fillon puna për edicionin e ardhshëm. Kontaktojmë artistët, planifikojmë skenat, mirëmbajmë hapësirën, kujdesemi për gjelbërimin, mbjellim drunj dhe bëjmë të gjitha përgatitjet që festivali të jetë edhe më i mirë”, tha ai.

Ai shtoi se ky organizim i vazhdueshëm e bën më të lehtë përgatitjen e çdo edicioni të ri.

Kastrati kujtoi se edicioni i vitit të kaluar ishte më i suksesshmi deri më tani, si për pjesëmarrje ashtu edhe për jehonën ndërkombëtare, por sipas tij, shifrat aktuale tregojnë se festivali i këtij viti pritet t’i tejkalojë të gjitha rekordet.

“Viti i kaluar ishte edicioni më i mirë dhe më i suksesshëm që kemi pasur, me jehonën më të madhe ndërkombëtare. Megjithatë, bazuar në numrat që kemi deri më sot, gjithçka tregon se sivjet do të kemi një edicion edhe më të madh”, përfundoi Kastrati.

NDIQNI VIDEON:

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-