Partia Demokratike e Kosovës (PDK) mbajti sot mbledhjen e rregullt të Kryesisë, ku u diskutua për zhvillimet politike pas zgjedhjeve të 9 shkurtit dhe për hapat e ardhshëm në prag të konstituimit të Kuvendit, të caktuar për 15 prill nga Presidentja e Republikës.

Kryetari i PDK-së, Memli Krasniqi, informoi anëtarët e Kryesisë për komunikimet që ka zhvilluar me partitë parlamentare, përjashtuar subjektet në pushtet – Vetëvendosjen, Guxo-n dhe Alternativën.

Ai theksoi se nëse subjekti fitues i zgjedhjeve nuk arrin të formojë shumicën, atëherë PDK-ja është e gatshme të marrë përgjegjësinë për ndërtimin e Qeverisë së re, me Bedri Hamzën si kandidat për Kryeministër.

-Advertisement-

“PDK-ja do të veprojë në përputhje të plotë me Kushtetutën dhe vlerat demokratike. Nuk do të ndërmarrim asnjë veprim që do të bllokonte apo pengonte funksionimin institucional gjatë seancës konstituive,” deklaroi Krasniqi.

Ai gjithashtu theksoi prioritetet e partisë për zhvillimin ekonomik, forcimin e marrëdhënieve me partnerët strategjikë dhe avancimin e integrimit euroatlantik.

Nga ana e tij, Bedri Hamza, si kandidat për postin e Kryeministrit, rikonfirmoi angazhimin për një qeverisje që do të sjellë zhvillim dhe mirëqenie për të gjithë qytetarët e Kosovës.

Në përfundim të mbledhjes, PDK theksoi rëndësinë e krijimit të shpejtë të institucioneve të reja, për të adresuar sfidat me të cilat përballen qytetarët dhe për të ecur përpara në agjendën shtetërore.

Në njoftimin e partisë thuhet se para mbledhjes së Kryesisë, kryetari Krasniqi ka zhvilluar një drekë pune me të gjithë deputetët e zgjedhur të PDK-së, ku janë diskutuar përgatitjet dhe qëndrimet e grupit parlamentar në lidhje me seancën e 15 prillit dhe hapat e ardhshëm politikë.

“Para mbledhjes së Kryesisë, Kryetari i Partisë Demokratike të Kosovës, Memli Krasniqi, ka takuar sot të gjithë deputetët e zgjedhur të PDK-së në një drekë pune. Gjatë takimit, ata kanë diskutuar në mënyrë të detajuar për përgatitjet dhe qëndrimet e partisë në lidhje me seancën konstituive të 15 prillit, duke u fokusuar në hapat e ardhshëm dhe prioritetet e grupit parlamentar”, thuhet në njoftimin e PDK-së.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-