Trajneri i Manchester City, Pep Guardiola, ka ndarë mendimet e tij për “Topin e Artë” pasi pa Rodrin të triumfojë përballë Vinicius Junior.

Vinicius Junior ishte favorit për të mposhtur Rodrin në garën për “Topin e Artë” pasi udhëhoqi skuadrën e Carlo Ancelotti drejt titujve në La Liga dhe Champions League sezonin e kaluar. Megjithatë, çmimi prestigjioz përfundoi në duart e Rodrit, duke shkaktuar një reagim të ashpër nga Real Madrid, që bojkotoi ceremoninë në Paris të hënën.

Drejtuesi i France Football, Vincent Garcia, u përpoq të shpjegojë se përse Vinicius Jr nuk fitoi, duke sugjeruar se ai “ishte shumë afër”. Guardiola mendon gjithashtu se cilido nga lojtarët mund të kishte fituar.

“Duhej të ishte Vinicius? Ndoshta. Është [votuar nga] gazetarë, jo një grup elitar njerëzish që vendosin. Janë njerëz nga e gjithë bota që votojnë, jo vetëm një vend. Ka opinione të ndryshme, dhe kjo është ajo që e bën futbollin të bukur, apo jo?”, tha Guardiola para gazetarëve në një konferencë për shtyp.

“Kjo u takon atyre. Nëse duan të shkojnë (për bojkotin e Real Madrid për ceremoninë), është në rregull. Nëse jo, gjithashtu është në rregull. Në Manchester City, nuk jemi këtu për të gjykuar klubet e tjera për vendimet që marrin. Për shembull, sezonin e kaluar, Erling [Haaland] fitoi tripletë me City dhe shënoi mbi 50 gola. I thashë ‘thjesht të jesh aty, duhet të jesh shumë i lumtur’. Të njëjtën gjë i thashë Rodrit. Nëse je në dy, tre apo katër të parët, është e jashtëzakonshme. Duhet të jesh shumë i kënaqur. Sezonin e kaluar, duhej të kishte fituar Erling? Po. Duhej të kishte fituar Messi? Po. Nuk është e rëndësishme [kush fiton]. Kjo përfaqëson që ti dhe shokët e skuadrës keni bërë diçka shumë të mirë atë sezon”, u përgjigj Guardiola kur u pyet për bojkotin që bëri Real Madrid për ceremoninë.

Guardiola gjithashtu u bëri thirrje Real Madridit që ta “pranojnë” rezultatin dhe shprehu krenarinë e tij për fitoren e Rodrit si lojtari i parë i Manchester City që fiton “Topin e Artë.”

“Ky event duhet të jetë një kënaqësi, njerëzit duhet t’i pranojnë rezultatet. Si klub, jemi shumë të lumtur që Rodri është lojtari i parë i këtij klubi që fiton këtë çmim. Është si [fitorja në] Premier League dhe Champions League. Jemi shumë krenarë”, shtoi ai.

Ndryshe, si statistikë interesante është se Rodri ishte lojtari në pesë ligat kryesore të Evropës me më shumë prekje të topit (120.3) për ndeshje sezonin e kaluar në të gjitha kompeticionet.

Birra të ftohta e me shumë ZBRITJE veç në Viva Fresh!

Sponsoruar