Një javë më parë, më 24 shtator 2023, në Banjskë të Zveçanit u vra në krye të detyrës rreshteri i Policisë, Afrim Bunjaku.

Sulmi ishte përgatitur nga grupi terrorist, i cili sipas ministrit të Brendshëm, Xhelal Sveçla, përbëhej nga rreth 90 persona dhe drejtohej nga Millan Radoiçiq.

Në videot e publikuara nga media vendore e ndërkombëtare shihet se si një pjesë e këtij grupi terrorist janë larguar nga zona e Banjskës për në Serbi.

-Advertisement-

Largimi i tyre ngjalli debat në vend, e shpesh u pretendua se ky largim i pjesëtarëve të grupit terrorist u negociua.

Mirëpo, kjo u mohua sot nga ministri Xhelal Svjeça e drejtori i përgjithshëm të Policisë së Kosovës, Gazmend Hoxha, të cilët prezantuan dëshmi të reja e video-materiale që u nxorën nga dronët e grupit terrorist që kreu sulm në Kosovë e nga autoblindat e Policisë nga vendi ku ishte kryer sulmi në të cilin u vra Afrim Bunjaku e një koleg i tij u plagos.

“Nuk ka pasë kurrfarë negocimi me askënd gjatë këtij aksioni. Unë nuk mund të rresht së falënderuari Policinë e Kosovës për profesionalizmin e tyre“ – tha Sveçla.

Tutje ministri tha se policët atë ditë kanë qenë në numër më të vogël sesa sulmuesit.

“Armatimin e keni pa, policia jonë nuk zotëron armatim të këtij kalibri edhe terreni ka qenë i vështirë pasi në vazhdimësi është përballur me prita dhe përkundër gjithë kësaj ajo ka treguar profesionalizëm të pashembullt” – shtoi i pari i MPB—së.

“Tërheqja e këtyre pjesëtarëve është edhe për shkak të terrenit të rëndë, kjo u ka mundësuar atyre tërheqjen, por patjetër edhe përgatitja e tyre ushtarake ka ndikuar” – vazhdoi tutje ai.

Edhe drejtori i Policisë mohoi të ketë pasur negocim me sulmuesit.

Ai tha se nuk ka pasur asnjë komunikim dhe asnjë tentativë për t’i liruar dikujt korridor për t’u tërhequr.

“Janë dy çështje, terreni i vështirë dhe profesionalizmi i Kosovës. Ne nuk kemi polici që çdokë që e shohim atje e qëllojmë dhe e vrasim, ne jemi polici që kemi vlera demokratike dhe mbi ato vlera e përdorimin edhe forcën” – tha ai.

Më 24 shtator 2023 një sulm terrorist u krye në Banjskë të Zveçanit.

Afrim Bunjaku, rreshter i Policisë së Kosovës, u vra, një polic tjetër u plagos e një tjetër u lëndua nga ky sulm, ndërsa Policia u sulmua disa herë radhazi nga grupi terrorist deri sa këta të fundit ikën në drejtim të Serbisë.

Në ditën kritike Policia sekuestroi 24 automjete, dy autoblinda e arsenal të madh armatimi luftarak që i kishte grupi terrorist.

Sekuestrimi i armëve të tjera po vazhdon që nga 24 shtatori, të cilat janë braktisur nga grupi terrorist në Banjskë dhe në zonën përreth.

Tre persona nga ky grup u vranë e disa të tjerë u arrestuan. Trupat e tre të vrarëve iu dorëzuan më 30 shtator 2023 familjarëve të tyre, pas përfundimit të procedurave të nevojshme nga organet kompetente.

Është ish-nënkryetari i Listës Serbe – partia më e madhe e serbëve në Kosovë që ka edhe mbështetjen e Qeverisë serbe – Millan Radoiçiq, i cili ka marrë përgjegjësinë për sulmin ndërsa ka dhënë dorëheqje nga posti në partinë që i përkiste.

Radoiçiq tha se të gjithë skenarin e kishte bërë vet dhe askujt nuk i kishte treguar. Këto pretendime i njëjti i bëri përmes një letre të cilën e lexoi të premten pasdite avokati i tij i autorizuar, Goran Petronijeviq.

Sulmin terrorist të 24 shtatorit e dënuan ashpër edhe ndërkombëtarët.

Zhvillime të shumta pati që nga data e lartpërmendur. Në kufi me Kosovën, Serbia shtoi praninë e trupave ushtarake.

Mirëpo më 30 shtator 2023, presidenti serb, Aleksandar Vuçiq, tha se “nuk e ka ndër mend ta urdhërojë ushtrinë” të kalojë kufirin me Kosovën dhe se do t’i tërheqë forcat serbe nga ajo pjesë, duke pretenduar se nuk është e vërtetë se Serbia po e dërgon ushtrinë në kufi.

“Vitin e kaluar kishim 14,000 njerëz pranë vijës administrative, sot kemi 7,500 dhe do ta reduktojmë në 4,000” – tha Vuçiq për “Financial Times”.

Më 29 shtator 2023, Shtetet e Bashkuara të Amerikës i bënë thirrje Serbisë t’i tërheqë trupat nga kufiri, duke e quajtur zhvendosjen e tyre “zhvillim shumë destabilizues”.

E një ditë më pas, të shtunën, edhe Qeveria e Kosovës dhe Bashkimi Europian i kërkuan po ashtu Serbisë t’i tërheqë trupat nga kufiri, raporton Kallxo.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-