Lajme

Nagavci tregon numrin e prindërve që kanë aplikuar për subvencionimin e teksteve shkollore

Autori: Gazeta inFokus 19:46 | 25 August 2023

Ministrja e Arsimit, Arbërie Nagavci, ka njoftuar se deri në orën 19:00 gjithsej 11 mijë e 800 prindër ose kujdestarë ligjorë kanë aplikuar për subvencionimin e teksteve shkollore.

Ajo ka bërë të ditur se mundësia për të aplikuar do të jetë e hapur deri në fund të muajit shtator, me qëllim që asnjë nxënës të mos mbetet pa u pajisur me tekste shkollore.

“Nga Drejtoritë komunale të arsimit kemi kërkuar që listat për tekstet mësimore të zgjedhura nga aktivat profesionale, t’i bëjnë publike në shkolla dhe në uebfaqet e tyre, ashtu që prindërit të kenë të dhënat e nevojshme për tekstet që do të blejnë për fëmijët e tyre. Jemi të njoftuar po ashtu se mësimdhënësit tashmë kanë filluar t’i ndajnë këto lista me prindërit”, ka shkruar ministrja në llogarinë e saj zyrtare në Facebook.

-Advertisement-

Tutje, ka shtuar se shtëpitë botuese kanë publikuar katalogët e teksteve mësimore me çmimet përkatëse dhe se kanë marrë zotimin që çmimet nuk do të rriten e po ashtu që sasia e teksteve është e mjaftueshme për numrin e nxënësve.

“Institucionet edukativo-arsimore me fillimin e vitit të ri shkollor, përmes DKA-ve, do të na informojnë në lidhje me fillimin e vitit të ri shkollor, duke evidentuar edhe rastet eventuale të nxënësve të cilët mund të mos jenë pajisur me tekste shkollore si rezultat i mos-pranimit të mjeteve nga ana e prindërve për çfarëdo arsye”, ka deklaruar Nagavci.

Sipas saj, të gjitha rastet e adresuara nga shkollat/ DKA-të apo në e-mailin [email protected] do të trajtohen ashtu sikurse do të adresohet çdo shqetësim teknik apo tjetër dhe asnjë nxënës nuk do të mbetet pa përfituar mbështetjen për tekstet dhe mjetet mësimore.