Lajme

Kurti për dialogun Kosovë-Serbi: Për një dialog efikas, të dyja palët duhet të respektojnë parimet e demokracisë dhe të BE-së

Autori: Gazeta inFokus 12:10 | 17 May 2023

Kryeministri i Republikës së Kosovës, Albin Kurti zhvilloi sot një bashkëbisedim me studentët e Akademisë Diplomatike të Vjenës, në ambientet e Fakultetit Filozofik në Prishtinë.

Kryeministri Kurti derisa foli për 15- vjetorin e Pavarësisë së Kosovës, sfidat, arritjet e sukseset, po ashtu veçoi edhe qëndrimin ambicioz të Qeverisë që ai udhëheqë ndaj reformave demokratike në të gjithë sektorët e qeverisë, veçanërisht sigurimin e një sistemi më të fortë të mirëqenies, forcimin e shtetit të së drejtës, mbrojtjen dhe përforcimin e të drejtave të njeriut, përfshirë të drejtat e minoriteteve dhe rritjen e ekonomisë.

Ky progres, theksoi ai, është njohur gjerësisht nga raporte të shumta ndërkombëtare, duke forcuar reputacionin e Kosovës si një histori suksesi në shtetin e demokracisë.

-Advertisement-

“Kosova ka marrë qëndrim të qartë kundër sulmit të paprovokuar të Rusisë në Ukrainë. Ne kemi implementuar sanksione, në koordinim me BE-në dhe SHBA-në, për të dënuar agresionin e Rusisë. Është dëshpëruese të theksohet se Serbia nuk e ka ndjekur shembullin. Ky kontrast nënvizon dallimin mes përkushtimit tonë ndaj vlerave demokratike dhe përkushtimit tonë ndaj parimit të bashkëpunimit ndërkombëtar. Fqinji ynë jodemokratik nuk është problem vetëm për Kosovën, por edhe për të gjithë rajonin e Ballkanit Perëndimor”, ka thënë Kurti.

Kurti ka folur edhe për dialogun Kosovë – Serbi.

“Dialogu Kosovë – Serbi në kuadër të Bashkimit Evropian mbetet jetik për rrugën para për zgjidhjen e çështjeve të pazgjidhura mes dy shteteve tona. Megjithatë, për të qenë ky dialog efikas, të dyja palët duhet të respektojnë parimet më thelbësore të demokracisë dhe të Bashkimit Evropian. Ne besojmë se Bashkimi Evropian është platforma dhe synimi që ka burime të mjaftueshme dhe traditë për të zgjidhur problemet që ne kemi për të normalizuar marrëdhëniet mes nesh. Ndërsa ecim përpara, Kosova mbetet e palëkundur në përkushtimin tonë ndaj demokracisë, të drejtave të njeriut dhe shtetit të së drejtës”, tha Kurti.

Në këtë takim të kryeministrit Kurti me studentët nga Akademia Diplomatike e Vjenës, i pranishëm ishte edhe Ambasadori i Austrisë në Kosovë, Christoph Weidinger.

Subscribe në YouTube: GAZETA INFOKUSI