Presidenti francez, Emmanuel Macron dhe Kancelari gjerman, Olaf Scholz njoftuan të premten(4 shkurt) se do të udhëtojnë për në Ukrainë dhe Rusi, ndërsa përpjekjet diplomatike po rriten për të zbutur një krizë në rritje në rajon.

Udhëheqësit në të gjithë Evropën po intensifikojnë përpjekjet e tyre diplomatike për të ulur tensionet pasi Moska grumbulloi më shumë se 100,000 trupa pranë kufijve të Ukrainës.

Macron pritet të udhëtojë në Moskë dhe Kiev javën e ardhshme për përpjekje ndërmjetësuese, njoftoi Pallati Elysée në Paris.

Së pari, Macron do të fluturojë për të takuar presidentin rus Vladimir Putin të hënën (7 shkurt) dhe të nesërmen, një takim me presidentin ukrainas Volodymyr Zelensky është në rendin e ditës.

Ai kishte folur së fundi me të dy në telefon disa herë. Ministrja e Jashtme gjermane, Annalena Baerbock do të udhëtojë gjithashtu në Kiev këtë të hënë, pas një vizite të mëparshme në mes të janarit.

Ajo do të takohet me Zelenskyn dhe Ministrin e Jashtëm, Dmytro Kuleba, sipas një zëdhënësi të Zyrës së Jashtme në Berlin.

Scholz do të udhëtojë në rajon një javë më vonë.

Ai është planifikuar të vizitojë Moskën më 15 shkurt, për të zhvilluar bisedime me Putinin, tha Kremlini në një deklaratë të transmetuar nga agjencia e lajmeve, TASS.

Scholz do të marrë pjesë në bisedimet në Kiev më 14 shkurt përpara se të niset për në Moskë të nesërmen.

Për Scholz-in dhe Putinin, ky do të jetë takimi i parë ballë për ballë që kur Scholz erdhi në krye të Gjermanisë në dhjetor.

Si Gjermania ashtu edhe Franca kanë ndërmjetësuar në konfliktin e Ukrainës prej vitesh. Paraprakisht, Scholz do të vizitojë Uashingtonin të hënën, ku ka në plan të takojë presidentin e SHBA-së, Joe Biden.

Bisedimet e tyre pritet të përqendrohen te kriza. Duke pasur parasysh vendosjen e më shumë se 100,000 ushtarëve rusë në zonën kufitare me Ukrainën, ka frikë se Kremlini po planifikon një pushtim të vendit fqinj, një ish-republikë sovjetike.

Moska e mohon këtë.

Mendohet gjithashtu e mundshme që pala ruse dëshiron të ngjall frikë në mënyrë që të bindë NATO-n të bëjë lëshime.

Përveç kësaj, liderët e Lituanisë, Letonisë dhe Estonisë priten gjithashtu në Berlin për bisedime në lidhje me krizën.

Ndërkohë presidenti turk, Rexhep Tajip Erdogan kritikoi liderët perëndimorë, duke përfshirë Biden, për “dështimin për të kontribuar në zgjidhjen” e tensioneve midis Ukrainës dhe Rusisë.

” Mund të them se ata vetëm e anashkalojnë situatën,” tha Erdogan të premten, sipas agjencisë shtetërore të lajmeve Anadolu, pas vizitës së tij në Kiev.

“Para kësaj, Merkel dilte duke mbajtur një çelës në duart e saj për një zgjidhje. Ne nuk kemi një lider të tillë në këtë moment,” tha lideri turk.

Erdogan përsëriti se Turqia shpreson të ndërmjetësojë mes Kievit dhe Moskës pas takimit të tij të planifikuar me Putinin.

Megjithatë, nuk ishte menjëherë e qartë nëse dhe kur të dy udhëheqësit do të takoheshin./REL/

Lansohet aplikacioni më i ri i lojalitetit që sjell t’mira pafund Kartela Plus!

Sponsoruar