Pas deklaratës se kryeministrit Albin Kurti, në seancën e djeshme të Kuvendit, ku i kritikojë Sindikatat se në vend se të kërkojnë kushte më të mira të punës po kërkojnë rritje të pagave, kanë reaguar përfaqësuesit sindikalë, shkruan Gazeta Infokus.

Në një prononcim për Gazetën Infokus, kryetari i Sindikatës së Bashkuar të Arsimit (SBASHK), Rrahman Jashari, ka thënë se kjo deklaratë nuk qëndron fare sepse në çdo takim e ka ngrehur çështjen e kushteve të shkollave.

“Sa i takon asaj se SBASHK-u po kërkon vetëm rritje të pagave dhe se nuk është kujdesur asnjëherë për kushtet në punë nuk qëndron fare, sepse unë edhe në mediat e nderuara, në debate televizive dhe në takimet me institucionet gjithmonë e kam ngritë çështjen e kolegëve të mijë, duke i përfaqësuar ata për të kushteve të shkollave sepse ne ende po merremi me shkumës dhe shpuza, dhe e kemi ngritur zërin duke kërkuar që shkollat të jenë të pajisura me ujë të pijshëm, me mjete dezinfektimit, me mjete higjienike e të tjera”, tha Jashari.

Ndërsa, kryetari i Sindikatës së Infermierëve, Fitim Havolli, tha se si sindikatë nuk mendojnë se i takojnë kësaj gjuhe të kryeministrit Kurti.

“Ne si sindikatë e Infermiereve nuk mendojmë se i takojmë kësaj gjuhe të kryeministrit Kurti, mirëpo e kaluara vërtetë na ka dëshmuar që gjërat janë keq për fajin e pikërisht të këtyre sindikatave, sepse kanë bërë marrëveshje për çështje që tashme janë bërë publike. Ndërsa, sa i përket anës së sindikatës sonë, përveç që kemi kërkuar që të rregullohet aspekti social dhe ekonomik sipas ligjit, kemi kërkuar po ashtu që të rregullohen kushtet, siguria në punë, vendi i punës e të tjera” ka thënë Havolli për Infokus.

Nga Federata Sindikale e Shëndetësisë, kryetari i saj Blerim Syla, tha se prej 13 pikave që kanë kërkuar si federatë, vetëm dy janë për paga, ndërsa të tjerat janë ato që i ka premtuar vet Kurti.

“Ne, së pari jemi duke u përgatitë për greva dhe së dyti do t’i bëjë publike marrëveshjet që po thirret Kurti. Aty keni me e pa se prej 13 pikave që kemi kërkuar si federatë, janë vetëm dy për paga, ndërsa të tjerat kanë të bëjnë me atë që ka premtuar Kurti. Ndërsa për grevën nuk dihet ende ku do të mbahet. Këshilli drejtues do të vendos këto ditë. Me këto provokime që po bënë Kurti sinqerisht është ka shkakton trazira shumë të mëdha”, ka thënë Syla./Gazeta Infokus/

Spektakli i Vitit, Ekskluzivisht në Artmotion – BBVK3!

Sponsoruar