Kandidati i Lidhjes Demokratike të Kosovës (LDK) për kryeministër, Avdullah Hoti, tha të premten në Ferizaj se Kosova po prin në rajon me rimëkëmbjen e shpejt ekonomike, si rezultat i menaxhimit me sukses të pandemisë.

Kryeministri Hoti tha se ndryshe prej oponentëve tanë, të cilët për interesa të tyre personale e partiake e izoluan Kosovën, Qeveria e drejtuar nga LDK-ja, si pjesë e Partive Popullore Evropiane, i ka të hapura të gjitha dyert në Evropë, Shtetet e Bashkuara të Amerikës dhe kudo në vendet demokratike.

Ai shpalosi programin e tij për zhvillim ekonomik dhe tejkalim të pasojave të pandemisë. Me këtë rast Hoti falënderoi diasporën kosovare të cilët me remitencat e tyre, jo vetëm që ndihmuan familjet, por edhe ekonominë e Kosovës për të kaluar më shpejt dhe më lehtë pasojat e pandemisë.

-Advertisement-

“Zhvillimi ekonomik do të mbështetet në sektorin privat, i cili është bazë për zhvillim të qëndrueshëm ekonomik. Do të punohet në krijimin e kushteve për punësim të qëndrueshëm dhe dinjitoz, duke promovuar konkurrencën e lirë, me rol të kufizuar të shtetit në ekonomi, kryesisht si lehtësues e rregullator i zhvillimit ekonomik, bazuar në prioritetet nacionale zhvillimore, me kujdes të veçantë ndaj mjedisit, për ta ruajtuar atë edhe për brezat e ardhshëm”, tha Hoti.

Kandidati i LDK-së për kryeministër shtoi se Kosova e ka të domosdoshme përgatitjen e një orientimi të qartë strategjik afatgjatë të zhvillimit, ku vendosen prioritetet zhvillimore dhe kornizat e politikave ekonomike, fiskale e buxhetore dhe të borxhit publik, që tejkalojnë një mandat qeverisës.

“Një dokument i tillë do të shërbejë si një Kod Ekonomik, i cili përmban parimet për politikat ekonomike dhe shërben si kornizë e legjislacionit të fushës së ekonomisë dhe të procedurave që zbatohen për mbështetje të zhvillimit ekonomik. Një qasje e tillë siguron gjithëpërfshirje dhe integrim në zhvillim me efekte sinergjie”, tha kryeministri Hoti.

Ai tha se për Ferizajn, në buxhetin e këtij viti dhe të vitit të ardhshëm janë paraparë 35 milionë projekte të ndryshme, duke përfshirë impiantin për ujëra të zeza, unazën e jashtme në segment Prelez-Jerlive deri në Nerodime, rrugën për Kashtanjevë, nënkalimin për vetura në Ferizaj, renovimin e stadiumit të qytetit, renovimin e shkollës së mesme të ulët, shkollën profesionale dhe plot projekte të tjera.

Kryetari i Degës së LDK-së në Ferizaj, Muharrem Sfarqa tha se LDK-ja e ka kulturën politike, kandidatin më të mirë për kryeministër dhe kandidatët më eminentë për deputetë për t’i dalë zot Kosovës në këto kohë të vështira.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-