Tensione në gjykimin për sulmin ndaj Kuvendit, përjashtohet aktivisti i VV’së
Autori: Gazeta inFokus 11:13 | 21 October 2020
Kryetari i trupit gjykues, gjykatësi Beqir Kalludra, pas tërheqjes së vërejtjes, ka larguar nga salla të akuzuarin Egzon Haliti, i cili së bashku me ish-deputetin Frashër Krasniqi dhe tre aktivistëve të tjerë, po akuzohen për vepra penale të terrorizmit.
Në këtë proces gjyqësor i cili ishte kthyer në rigjykim, Frashër Krasniqi, Adea Batusha, Egzon Haliti dhe Atdhe Arifi, janë duke u akuzuar me pretendimet se ata janë përgjegjës për sulmin në Kuvendin e Kosovës në gushtin e vitit 2014, që është kualifikuar si vepër terroriste, raporton “Betimi për Drejtësi”.
Gjatë seancës së të mërkurës, gjykatësi Kalludra, ia ka tërhequr vërejtjen të akuzuarit Egzon Haliti dhe e ka udhëzuar që përsëritja e veprimeve dhe deklarimet pa lejen e kryetarit të trupit gjykues, do të kenë pasoja ligjore.
“Nëse e vesh jaknen a”, i është drejtuar i akuzuari Haliti, gjykatësit Kalludra.
Pas kësaj, gjykatësi Kalludra, e ka udhëzuar edhe të akuzuarin Frashër Krasniqi që të heq dorën nga tavolina dhe të ulet mirë në sallën e gjykimit.
“Njërit i thu pse e vesh jaknen e mu qysh mu ul, mos boni hajgare me neve, çka paske sot, largom nga salla unë ulna qysh du, kallxoma ligjin që e përcakton qysh mu ul”, i është kundërpërgjigjur i akuzuari Krasniqi, gjykatësit Kalludra.
“Autoriteti i gjykatës respektohet, këtu nuk je në kafe, unë të tregoj edhe qysh me u ulë, nëse nuk ulesh qysh duhet del nga salla”, i është drejtuar gjykatësi Kalludra të akuzuarit Krasniqi.
Për shkak se në këtë seancë nuk ka prezantuar prokurorja speciale Fikrije Fejzullahu, e njëjta gjatë kohës sa gjykatësi Kalludra ishte duke konstatuar shtyrjen e kësaj seance, e ka kontaktuar të njëjtin përmes telefonit dhe e kishte njoftuar se nuk kishte qenë në dijeni për këtë seancë.
Pasi gjykatësi Kalludra është përgjigjur në telefon në sallë të gjykimit, ka reaguar i akuzuari Haliti.
“As në telefon mos fol pra, që 4 vjet jem tu marr me sene palidhje, sjelljet i kem pa edhe vendimet i kem pa”, ka thënë i akuzuari Haliti, derisa gjykatësi Kalludra komunikonte përmes telefonit me prokuroren speciale Fikrije Fejzullahu.
“Dhe ju pom tregoni çka me bo a, ju se dini për çka e hapa telefonin”, i është drejtuar gjykatësi Kalludra të akuzuarit Haliti.
Pasi i akuzuari Haliti ka vazhduar të komentojë pa lejen e gjykatës, gjykatësi Kalludra e ka larguar të njëjtin nga salla e gjykimit dhe ka njoftuar se largimi i tij do të zgjas deri në përfundim të seancës së të mërkurës, pasi sipas tij, i akuzuari Haliti vazhdimisht e ka ndërprerë.
“Edhe ne paraburgim qom edhe dënona, sot nëse e ke njet, e kem pa qysh na ke dënu edhe qysh ka shku djali për kushte ligjore, u vra Astriti edhe kërkush nuk ka dhënë përgjegjësi hala, kushtet ligjore, të drejtat, drejtësia”, ka thënë i akuzuari Haliti derisa ishte duke u larguar nga salla e gjykimit.
Ndryshe, përpos prokurores Fejzullahu në këtë seancë kanë munguar edhe dëshmitarët Rezi Zogiani, Egzon Metolli dhe Korab Veseli, ndërsa kanë prezantuar dëshmitarët Refki Jashari dhe Skender Imeri.
Në këto rrethana, seanca e së mërkurës është shtyrë, ndërsa seanca e radhës pritet të mbahet me 27 tetor 2020, në ora 09:00.
Ndryshe, në seancën e parë të rigjykimit, e paraparë të mbahej me 4 mars 2020, ish-mbrojtësi i të akuzuarit Krasniqi, avokati Tomë Gashi, kishte kërkuar përjashtimin e kryetarit të trupit gjykues, gjykatësit Beqir Kalludra, mirëpo kjo kërkesë ishte refuzuar.
Trupi gjykues i udhëhequr nga gjykatësi Beqir Kalludra, më 27 nëntor të vitit 2017, kishte shpallur fajtorë katër të akuzuarit, duke i dënuar me 21 vjet e gjashtë muaj burgim.
Ish-deputeti Frashër Krasniqi ishte dënuar me 8 vjet burgim, Atdhe Arifi ishte dënuar me 6 vjet burgim, Egzon Haliti me 5 vjet e gjysmë si dhe Adea Batusha me 2 vjet heqje lirie.
Pas ankesave në Gjykatën e Apelit, kolegji i instancës së dytë gjyqësore, kishte vlerësuar se aktgjykimi i shkallës së parë është bërë me shkelje ligjore dhe e kishte anuluar të njëjtin dhe në këtë mënyrë, lëndën e kishte kthyer në rigjykim.
Për rastin e aktivistëve të dënuar të VV-së, më 9 shkurt 2018, ishte diskutuar edhe në Kuvendin e Kosovës, në fund të së cilës seancë, Kuvendi kishte miratuar disa rekomandime ku kërkohej që për rastin e sulmit në ndërtesën e Kuvendit, të kërkohet dhe të mundësohet një hetim i plotë, i pavarur ndërkombëtar i tërë rastit, nga ndonjëri nga vendet perëndimore të BE, përfshirë vendet neutrale të Evropës Perëndimore dhe Zvicrën
Ndryshe, Prokuroria Speciale e Republikës së Kosovës, në dhjetor të vitit 2016, kishte ngritur aktakuzë kundër, Frashër Krasniqit, Atdhe Arifit, Egzon Halitit dhe Adea Batushës, të cilët i akuzon për kryerjen e veprës penale të terrorizmit.
Ndaj katër aktivistëve të Vetëvendosjes, PSRK-ja ka ngritur aktakuzë, katër muaj pasi të njëjtit, bashkë më të ndjerin Astrit Dehari, u arrestuan si të dyshuar për sulmin e 4 gushtit të po atij viti, ndaj objektit të Kuvendi të Kosovës, por, që Dehari kishte vdekur në nëntor të vitit 2016 në qelinë e tij në qendrën e paraburgimit në Prizren.
Sipas aktakuzës së Prokurorisë Speciale, të pandehurit kanë vepruar si grup i organizuar “me qëllim që të shkaktojnë frikësimin serioz të popullsisë dhe shkaktimin e ndjenjës se pasigurisë për qytetarët dhe institucionet e Republikës së Kosovës”.
Sipas aktakuzës, të akuzuarit duke pasur për qëllim, që Kuvendi i Kosovës të detyrohet të mos ratifikojë marrëveshjen për demarkacionin me Malin e Zi dhe me këtë rast, të shkaktoj frikësim serioz të popullsisë dhe shkaktimin e ndjenjës së pasigurisë tek qytetarët e Kosovës, më datë 4 gusht 2016, rreth orës 23 e 05 nga parkingu përball Kuvendit të Kosovës me raketahedhës dore kanë kryer sulmin ndaj Kuvendit të Kosovës.
Të tjera
-
BE: Këshilli do të diskutojë për masat ndaj Kosovës në bazë të një raporti të Borell mbi përmbushjen e kushteve
Zëdhënësi i Bashkimit Evropian, Peter Stano, ka thënë në linjë me konkluzion...
-
Voziti me fëmijë në prehër, dënohet me 400 euro gjobë, 5 pikë negative dhe i merret patentë shoferi për 6 muaj
Policia e Kosovës ka ndëshkuar një shofer në qytetin e Mitrovicës, pasi i një...
-
Lajçak: Kosova ta bëjë Asociacionin, Serbia t’ia njohë simbolet, dokumentet e institucionet
I dërguari i posaçëm i Bashkimit Evropian për dialogun ndërmjet Kosovës dhe S...
-
Qytetarët në Ferizaj dalin në ‘peshkim’ pas reshjeve të shiut
Qytetarët në qytetin e Ferizajt kanë shfrytëzuar rastin që të ironizojë pas p...
-
Vdẻs i moshuari nga Novi Pazari në një hotel në Prizren, dyshohet për su*m në zemër
Një 60 vjeçar, boshnjak nga Novi Pazari i Serbisë, ka vdekur sot derisa po që...
-
Ish-drejtori i KEK-ut Njazi Thaqi thotë Korporata po rrezikon falimentimin
Ish-drejtori i Korporatës Energjetike të Kosovës, Njazi Thaqi, përmes një shk...
-
Ish-deputetja e PDK-së, Xhevahire Izmaku aderon në Nismën e Fatmir Limajt
Ish-deputetja e PDK’së, Xhevahire Izmaku sot zyrtarizoi aderimin në Nismën e ...
-
Ministri Aliu deklaroi se autostrada Prishtinë-Mitrovicë përfundon brenda afateve, reagon deputetja e LDK-së
Deputetja e LDK-së, Rrezarta Krasniqi, ka reaguar lidhur me gjendjen e rrugës...
-
Besimi i investitorëve të huaj rritet në tremujorin e parë
Një sondazh i fundit nga Këshilli për Promovimin e Tregtisë Ndërkombëtare i K...
-
“Kur dikush nuk të pranon në dhomë për faktin se je e verbër”, studentja nga Vitia flet për diskriminimin
Kur një studente refuzoi ta ndante dhomën e konviktit me të, Mimoza Zejnullah...
-
Ministri Liburn Aliu i bindur: Magjistralja Prishtinë – Mitrovicë përfundon brenda afateve
Për më shumë se 10 vite, ekskavatorë e kamionë gjenden në magjistralen Prisht...
-
Regjistrimi s’pritet të ofrojë të dhëna shumë të sakta për personat me aftësi të kufizuara
Personat me aftësi të kufizuara shprehen skeptikë sa i përket procesit të reg...