Lajme

Zyra e Presidentes merr me qera 35 automjete për samitin dy-ditor

Autori: Gazeta inFokus 11:25 | 30 September 2022

Zyra e Presidentes së Kosovës ka paguar 8,791.00 euro për marrjen me qera të 35 automjeteve të cilat do të përdoren për nevoja të një samiti dy-ditor, të organizuar në Prishtinë nga shefja e shtetit.

Bazuar në njoftimin e Zyrës së Prokurimit të Presidencës, 35 automjetet – dhjetë prej tyre të klasit VIP, do të merren në shërbim me qera për bartjen e delegacioneve zyrtare pjesëmarrëse në Samitin për Gratë, Paqen dhe Sigurinë.

Tenderin e vlefshëm afër 9,000.00 euro e ka fituar kompania private e cila merret me marrjen dhe dhënien me qera të automjeteve, Corpora Sh.p.k, me bazë në fshatin Llapnasellë të Graçanicës, raporton Paparaci.

-Advertisement-

Me iniciativë të Presidentes së Republikës së Kosovës, Vjosa Osmani Sadriu, në Prishtinë do të organizohet edicioni i parë i Forumit për Gratë, Paqen dhe Sigurinë (GPS), më 22-23 tetor 2022.

Sipas njoftimit për media nga Zyra e Presidentes thuhet se forumi si temë do të ketë “Ndërtimi i aleancave për paqe të qëndrueshme”, ky ka për qëllim të reflektojë mbi sukseset dhe sfidat e kësaj axhende 22 vite pas miratimit, si dhe të rrisë ndërgjegjësimin mbi nevojën për të njohur e promovuar aftësitë e grave dhe vajzave për të kontribuar në mënyrë aktive e përmbajtjesore në procese të paqes dhe sigurisë.

“Ky edicion i parë i Forumit do t’i dedikohet trashëgimisë së ish-sekretares së SHBA-ve, Madeleine Albright. Forumi do të sjellë në Kosovë liderë nga rajoni dhe bota, akademikë, përfaqësues të organizatave ndërkombëtare, shoqërisë civile, e personalitete përgjegjëse për zbatimin e kësaj axhende.

Subscribe në YouTube: GAZETA INFOKUSI