Që kur ka filluar agresioni rus dhe shkelja e integritetit territorial të Ukrainës, ka pasur presione të mëdha ndërkombëtare që Vuçiqit të shkëputet nga lidhjet e ngushta me Putinin dhe të rreshtohet krah perëndimit. Megjithatë kreu i shtetit serb vazhdon të të rri ulur në dy karrige, ndërkohë që shfrytëzon ulësen ruse për presion ndaj perëndimit dhe BE-së.

Kreu i shtetit serb sot nga Tirana është munduar që të godasë perëndimin, më konkretisht Bashkimin Evropian që po i bëjnë presion për Ukrainën, duke u përpjekur t’i akuzojë për standarde të dyfishta duke shfrytëzuar rastin e Republikës së Kosovës.

Pas shtrëngimit të duarve me Ramën, Vuçiq në adresimin e tij për media ka thënë se ka ardhur në Tiranë për të treguar qëndrimet e Beogradit dhe për të “mbrojtur interesin shtetëror dhe nacional në përputhje me Kushtetutën”.

“Sepse do ta kemi këtu një mundësi të themi çfarë mendojmë. Ne mbetemi të përkushtuar për procesin e dialogut të ndërmjetësuar nga BE. Por në të njëjtën kohë duhet të mbrojmë interesin shtetëror dhe nacional në përputhje me Kushtetutën.  Jam këtu për të dëgjuar dhe për të shpjeguar pozicionin e Serbisë.  Është e rëndësishme që të marrim disa lajme të mira, dhe disa janë si mbështetja e BE-së për çështjen e energjisë dhe çështja e “roaming” është e rëndësishme për qytetarët. Dhe këto janë shenja të mira”, ka thënë Vuçiq.

Ai tutje ka thënë se Beogradi i di obligimet e veta në rrugën drejt BE-së dhe për të qenë në të njëjtën linjë me vendimet e Brukselit, megjithatë ka shtuar se është edhe një çështje tjetër për të cilën duhet diskutuar me zyrtarët e BE-së.

Vuçiq këtu ka përmendur intervenimin e NATO-s për çlirimin e Kosovës dhe shpëtimin e popullatës civile shqiptare nga masakrat dhe regjimi gjenocidal i Sllobodan Millosheviqit dhe aktin e shpalljes së pavarësisë së Republikës së Kosovës që mban vulën e Gjykatës Ndërkombëtare të Drejtësisë.

Siç pretendon ish-ministri i propagandës së Sllobodan Millosheviqit, këto dy momente janë “shkelje e tmerrshme e integritetit territorial të Serbisë”

“Serbia sigurisht është një shtet i pavarur dhe i dimë obligimet për rrugën drejt BE-së. I dimë obligimet që të jemi në linjë me vendimet e BE-së.

Por ne kemi një situatë rreth integritetit territorial të Serbisë, që ishte shkelur në mënyrën më të tmerrshme 1999 dhe me 2008 dhe do të flasim këtë gjë me zyrtarët e BE-së”, ka thënë kreu i shtetit serb.