Sport

U hap Kampionati Evropian i peshëngritjes U-15 dhe U-17 në Prishtinë

Autori: Gazeta inFokus 23:54 | 23 September 2017

Organizuar nga Federata e Peshëngritjes e Kosovës (FPK) është hapur Kampionati i parë Evropian për U-15 dhe U-17, që po mbahet në Pallatin e Rinisë dhe Sportit në Prishtinë dhe ku po marrin pjesë peshëngritësit më të mirë në Evropë.

Në ceremoninë hapëse, i pranishëm ishte edhe presidenti i Federatës Evropiane të Peshëngritjes (FEP), italiani Antonio Urso, zyrtarë tjerë të Federatës Evropiane dhe Botërore, president të federatave të ndryshme evropiane, presidenti i Komitetit Olimpik të Kosovës, Besim Hasani, zyrtarë të qeverisë, ambasadorë etj.

Ceremonia filloi me një minutë heshtje në përkujtim të ish-kryetarit të Federatës së Peshëngritjes së Kosovës, Ali Sekiraqa, i cili ndërroi jetë muajin e kaluar. Më pas, performimi i Ansamblit “Bajram Curri” i dha edhe më shumë hijeshi ceremonisë.

Kryetari i tanishëm i kësaj federate, Astrit Hasani, duke falënderuar drejtuesit e FEP-it për dhënien e organizimit, tha ndër të tjera se ky Kampionat do të shërbejë për zhvillimin e mëtutjeshëm të sportit të peshëngritjes në Kosovë.

-Advertisement-

Presidenti i Federatës Evropiane të Peshëngritjes, Urso, theksoi se është privilegj për të dhe FEP-in dhënia e organizimit të Kampionatit një vendi siç është Kosova, derisa shtoi se ky do të jetë vetëm një test për Federatën tonë, në mënyrë që në të ardhmen t’ju jepen edhe organizime më të mëdha.

Në fjalimin e tij, presidenti i KOK-ut, Besim Hasani, kujtoi të ndjerin Ali Sekiraqa, falë kontributit të të cilit FPK-ja fitoi projektin për ta organizuar një ngjarje të tillë. Hasani ua konfirmoi mysafirëve gatishmërinë e Lëvizjes Olimpike për të ndihmuar në zhvillimin e peshëngritjes në Kosovë, për të cilin sport tha se Kosova në të ardhmen synon të fitojë medalje olimpike, duke ndjekur rrugën e xhudistes Majlinda Kelmendit.

Në fund, drejtuesit e FPK-së ndanë mirënjohje për mysafirët dhe ata që ndihmuan në zhvillimin e këtij Kampionati, i cili do të mbahet deri më 30 shtator 2017.

Subscribe në YouTube: GAZETA INFOKUSI