Deputeti i Lëvizjes Vetëvendosje, Frashër Krasniqi vazhdon të jetë i akuzuar për terrorizëm, në rastin e sulmit të drejtuar objektit të Kuvendit të Kosovës.

Por, pavarësisht kësaj, Krasniqi arriti që të jetë prezent në çdo “seancë” të mbajtur deri më tani nga Legjislatura e Gjashtë e Kuvendit të Kosovës.

Gjatë ditës së djeshme në seancën konstituive, Krasniqi bëri bujë të madhe me deklaratën që bëri në drejtim të komandantëve të Ushtrisë Çlirimtare të Kosovës.

-Advertisement-

Madje Krasniqi nuk hezitoj të përmend emrin e liderit të AAK-së, Ramush Haradinajt, për të cilin tha se nuk po ngurron t’i gjunjëzohet Listës Serbe dhe “kriminelit” Ukë Rugova.

I kontaktuar nga Indeksonline, avokati mbrojtës i Krasniqit, Tomë Gashi ka bërë të ditur se për të qenë pjesë e seancave, Krasniqit i duhet që të bëjë kërkesë të re gjithmonë tek Gjykatësi.

“Për çdo seancë që ai merr pjesë duhet kërkesë e veçantë dhe deri më tani Gjykata e ka lejuar dhe sigurisht do të duhej që ta lejojë gjithmonë pasi është deputet i zgjedhur me votë të qytetarëve të cilët kanë votuar për të”, ka thënë Gashi.

Por sipas tij, deklarata e “nxehtë” që bëri dje nuk do t’i ndikojë që t’i refuzohet kërkesa për pjesëmarrje në seancë parlamentare.

“Absolutisht  nuk do të ndikojë sepse është imuniteti i cili e mbron dhe i jep të drejtën të deklarohet dhe deklarimet e tilla janë të drejta dhe Gjykata nuk ka të drejtë të përzihet fare në Kuvend për vendimet që i merr Kryesuesi”, ka shtuar Gashi.

Sipas Gashit, i vetmi mëkat i djeshëm i tij ka qenë përmendja e emrave të veçantë të disa komandantëve.

“Sigurisht se deklaratat e tij kanë qenë të lira pasi debati është lejuar nga kryesuesi i Kuvendit dhe Krasniqi nuk ka qenë i vetmi që ka debatuar. Mëkat i vetëm ka qenë që i ka cekur disa komandantë të cilët mund të jenë të përfshirë në raste të krimeve dhe jo të gjithë, por besoj që këtë mund ta bëjë herën e ardhshme”, ka përfunduar Gashi.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-