Lajme

Targat serbe dhe ato KS hiqen edhe në Graçanicë

Autori: Gazeta inFokus 13:43 | 20 September 2021

Aksioni i Policisë së Kosovës për heqjen e targave KS, nuk është duke u zhvilluar vetëm në pikat kufitare por në të gjithë Kosovën.

Një ekip i gazetës IndeksOnline ka qëndruar gjatë të hënës në Graçanicë dhe ka raportuar se edhe në këtë qytet është duke u zbatuar masa e reciprocitetit nga Qeveria e Republikës së Kosovës për targat e automjeteve.

Në hyrje të qytetit të banuar kryesisht me serbë, në Graçanicë, policia ka ndaluar çdo automjet me targa KS dhe ato me targa të Serbisë.

-Advertisement-

Targat KS janë konfiskuar ndërsa për targat e Serbisë u është thënë pronarëve të automjeteve se duhet të lajmërohen në kufi që të pajisen me targat e përkohshme të Republikës së Kosovës.

MPB ka njoftuar sot se të gjithë automjetet me targa të Serbisë që hyjnë në Kosovë, u vendosen targat e përkohshme të Republikës së Kosovës.

Ministria e Punëve të Brendshme, së bashku me Policinë e Kosovës është duke kryer veprime në të gjithat pikat kufitare të cilat kanë për qëllim zbatimin e marrëveshjes për lëvizjen e lirë – konkretisht targave të automjeteve.

Në orët e hershme të mëngjesit të së hënës, Policia e Kosovës, konkretisht Njësia Speciale Operative është vendosur në pikë kalimin e vjetër kufitar në mes të Kosovës dhe Serbisë, në Jarinje të komunës së Leposaviçit, për të filluar reciprocitetin e targave.

Të gjitha veturat që deri më tani kanë pasur targa të Serbisë, duhet t’i zëvendësojnë ato me “RKS”, targa të Republikës së Kosovës”, nëse duan të qarkullojnë brenda vendit.

Nga kampi i Njësisë Speciale në Mitrovicën Veriore i njohur si Belvedere, dhjetëra autoblinda të Policisë së Kosovës janë pozicionuar në këtë ish pikë kufitare.

Pas vendosjes së masave të reciprocitetit për tabelat “RKS” për të gjitha veturat të cilat futen në Kosovë nga Serbia, dhjetëra qytetarë serbë janë grumbulluar afër pikës kufitare në Jarinje.

Ata kanë bllokuar rrugën me kamionët e tyre në pikën kufitare dhe po presin, ndërkohë Policia e Kosovës po e vëzhgon situatën.

Subscribe në YouTube: GAZETA INFOKUSI