Shëndetësi

Studim i ri: Një dozë e vetme e vaksinës përgjysmon rrezikun e transmetimit të Covid-19 në çdo shtëpi

Autori: Gazeta inFokus 22:00 | 30 April 2021

Një dozë e vaksinës covid-19 mund të përgjysmojë rrezikun e transmetimit të koroanvirusit nga një person i vaksinuar te anëtarët e tjerë të pavaksinuar të së njëjtës familje, sipas studimit britanik, i cili rezulton si hulumtimi më i plotë deri më sot, për sa i përket ndikimit të imunitetit të vaksinuarve në transmetimin e virusit.

Zbulimi se njerëzit e infektuar me covid-19, pasi janë vaksinuar, kanë më pak të ngjarë të infektojnë të tjerët, rrit shpresat se përhapja e sëmundjes mund të ngadalësohet ndjeshëm, madje edhe midis të rinjve që nuk janë vaksinuar ende.Studimi, bazuar në të dhënat nga Institucioni i Shëndetit Publik Angli (PHE), sipas Financial Times dhe Guardian, përfshiu më shumë se 57,000 kontakte të ngushta dhe rreth 24,000 familje, ku të paktën një person ishte vaksinuar, krahasuar me gati një milionë persona të pavaksinuar.

Analiza statistikore krahasoi probabilitetin e transmetimit të koronavirusit nga një person i vaksinuar tek të tjerët, krahasuar me një person të pavaksinuar. U zbulua se ata që ishin infektuar tre javë pasi kishin bërë vaksinën e parë të BioNTech / Pfizer ose Oxford / AstraZeneca, kishin 38% në 49% më pak të ngjarë të transmetonin koronavirusin tek njerëzit e tjerë jo të vaksinuar në të njëjtën familje.

Mbrojtja nga virusi është vërejtur nga dita e 14-të pas dozës së parë, pavarësisht nga mosha e të vaksinuarit. Ekspertët po shqyrtojnë nëse dy dozat e vaksinave mund të zvogëlojnë më tej rrezikun e transmetimit nga të vaksinuarit te të pavaksinuarit.

Reklamë
Sekretari Britanik i Shëndetësisë Matt Hancock thotë se konkluzionete e studimit janë “lajm fantastik” dhe tregojnë se “vaksinat janë mënyra më e mirë për të dalë nga pandemia, pasi ato ju mbrojnë dhe gjithashtu mund t’ju parandalojnë që të mos infektoni pa dijeninë tuaj dikë në shtëpi”.

Megjithëse studimi është “shumë inkurajues”, sipas Dr Mary Ramsay i PHE, njerëzit e vaksinuar duhet të vazhdojnë të sillen sikur të kenë virusin, duke respektuar masa paraprake të tilla si larja e mirë e duarve dhe mbajtja e distancës nga të tjerët.Disa ditë më parë, një studim tjetër britanik nga Universiteti i Oksfordit dhe Byroja Kombëtare e Statistikave arriti në përfundimin se vaksinat jo vetëm që mbrojnë personin që vaksinohet, por gjithashtu ulin rrezikun e transmetimit të koronavirusit tek të tjerët.

Sipas asaj analize, një dozë e vetme e BioNTech / Pfizer ose Oxford / AstraZeneca zvogëlon rrezikun e transmetimit me gati 66% dhe në veçanti me 74% rrezikun e infeksionit covid-19 me simptoma. Pas dy dozave të Pfizer / BioNTech, ulja e transmetimit rritet në 70% dhe infeksioni simptomatik në 90%.

Të tjera