Sport

Rivaldo, kundër trajnerëve të huaj: “Seleçaon” ta drejtojë dikush që i rrjedh gjak brazilian

Autori: Gazeta inFokus 09:40 | 14 December 2022

Në një kohë kur po diskutohet për pasuesin e Tites te Brazili, Rivaldo, kampion me “Seleçaon” në vitin 2002, është kundër zgjedhjes së një të trajneri të huaj për pesë herë kampionët e Botës.

“Nuk jam dakord dhe mendoj se është mungesë respekti për trajnerët brazilianë që të mendojnë të punësojnë një trajner të huaj për kombëtaren tonë. Besoj se kemi trajnerë të aftë për të marrë kombëtaren në këtë moment dhe për të bërë një punë të mirë”, shkruan ish-sulmuesi, “Topi i Artë” në vitin 1999, tashmë 50 vjeç, në rrjetet sociale.

“Sjellja e një trajneri të huaj nuk është garanci se do të jemi kampionë bote. Besoj se trajneri i huaj do të donte të ishte kampion bote për vendin e tij dhe të bënte të lumtur kombin e tij. Të huajt janë pa dyshim trajnerë shumë të mirë, por “Seleçao” është jona, i kombit tonë dhe duhet të menaxhohet nga dikush që i rrjedh gjak brazilian në venat e tij. Gjëja më e rëndësishme janë lojtarët, ne duhet t’i ndihmojmë, t’i inkurajojmë dhe t’u japim besim…”.

-Advertisement-

Abel Ferreira dhe Jorge Jesus ishin disa nga emrat e sugjeruar si pasardhës të mundshëm të Tites, i cili la postin pas eliminimit të Brazilit në çerekfinale të Kupës së Botës. Në listën e kandidatëve janë, ndër të tjerë, edhe spanjollët Pep Guardiola dhe Luis Enrique dhe italiani Carlo Ancelotti.