Sport

Rikthehet Champions League, ja sfidat e mbrëmjes së sotme

Autori: Gazeta inFokus 13:53 | 22 October 2024

Kjo mesjavë rikthen emocionet e Champions League, me duele titanësh ku spektakli është i garantuar. Spikat supersfida Real Madrid-Borussia Dortmund në “Santiago Bernabeu”. Verdhezinjtë duan të hakmerren pas finales së humbur një vit më parë në stadiumin mitik “Wembley”, ku “Los Blancos” bënë për vete trofeun e 15 të Champions League.

Historia flet e gjitha për spanjollët, pasi nuk janë vetëm rekordmenët e këtij kompeticioni, por edhe në përballjet direkte fitues është ekipi i Ancelottit. Në 15 ndeshje që Dortmund ka luajtur me Realin, gjermanët kanë fituar vetëm 3, Reali ka triumfuar në 7, ndërsa 5 sfida janë mbyllur në barazim. Megjithatë, në ndeshje të tilla, statistikat janë thjesht histori dhe gjithçka mbetet për t’u parë dhe shijuar.

Në anën tjetër, Paris Saint Germain përballet me PSV Eindhoven. Francezët kanë detyrim vetëm fitore përballë holandezëve, pasi në rast të një tjetër disfate llogaritë për kampiionët e Ligue 1 mund të vështirësoheshin dhe më shumë. Ramos, Lucas Hernandez dhe Kimpembe nuk janë në dispozicion të teknikut Luis Enrique, ndërsa Kolo Muani është në dyshim. Në dy ndeshjet e para, Parisi ka fituar minimalisht ndaj Girona dhe është mundur 2-0 nga Arsenali. Për këtë arsye, kampionët e Francës duan të rikthehen sa më parë te tre pikët.

-Advertisement-

Arsenali kërkon tre pikët e radhës ndaj Shaktar Donjeck. “Topçinjtë” janë favoritë absolutë në letër, ndonëse mungesat mund të ndikojnë disi në fushë. Me Odegaard e Tomiyasu të dëmtuar dhe Saka në dyshim, anglezët do të zbresin në fushë vetëm për fitore. Deri më tani, londinezët kanë barazuar me Atalantën në ndeshjen e parë dhe kanë fituar ndaj Paris Saint Germain.

Në anën tjetër, Juventus sfidon Stuttgart dhe kërkon fitoren e tretë radhazi në Ligën e Kampionëve. Bardhezinjtë vijnë me shumë mungesa, që nga portieri Di Gregorio i ndëshkuar me karton të kuq në ndeshjen me Leipzig, ndërsa Bremer, Koopmeiners, Milik dhe McKennie janë të dëmtuar.

Në orën 18:45, Milani, pas shumë problemeve që po kalon, për t’u ringritur kërkon medoemos tre pikë ndaj belgëve të Club Brugge, ndërsa Bologna përballet me Aston Villa në transfertë.

Subscribe në YouTube: GAZETA INFOKUSI
Etiketa:
Kryetari Përparim Rama pjesë e ‘Mayor’s Talk’
-Advertisement-

Të tjera

Fokusi

sport