Është mbajtur aksioni ‘humanitar’ me moton “Kryeministër na po vim met ndihmu”, ku qytetarë ‘të vullnetit të mirë’, i dërguan kravatat kryeministrit.

Ky aksion humanitar është ndërmarrë nga iniciativa e organizatës “Beyond the Wall” dhe është mbajtur para Teatrit Kombëtar.

Mbi 200 kravatat e mbledhura bashkë me këmisha të dhuruara nga qytetarë me rastin e aksionit të organizuar janë vendosur në rrethojat e Qeverisë, shkruan Infokusi.com

Kushtrim Mehmeti, njëri nga organizatorët të kësaj proteste, tha se është e pakuptimtë që një kryeministër i një vendi kaq të varfër siç është Kosova, t’ia rrisë vetës rrogën në këtë formë.

“I kërkojmë kryeministrit që për gjëra subjektive le ta ulë pagën, dhe i premtojmë që për të tilla gjëra, popullin do ta ketë afër. Qoftë edhe me shty kerre. Kjo është iniciativa jonë, e një grupi të rinjsh. Ne kërkojmë veç respekt, në mënyrë që të punojmë për ta ndërtuar të ardhmen. Ne nuk kemi asgjë personale me kryeministrin Haradinaj. Por këto vendime janë jo të mira për popullin e Kosovës”- ka thënë Mehmeti.

Gjithashtu Mehmeti tha se kryeministri ia ka rritur pagën vetës në një popull të varfër siç është Kosova, madje me një popull që ndoshta ka një pagë 200 euro e nuk brengoset për kravatë.

“Ne jemi popull solidar. Unë gati sa nuk qava kur e pashë sot njërin që e hoqi kravatën për ta lënë këtu. Ramush Haradinaj është kryeministër i një populli të varfër. Një populli që ndoshta jeton me 200 euro, por nuk e ka problem një kravatë. Ai nuk duhet ta harrojë kurrë që përfaqëson një popull që nuk është i pasur”- ka shtuar Mehmeti.

Derisa po zhvillohej protesta, i pranishëm në këtë protestë ishte edhe Këshilltari për media nga zyra e kryeministrit, Halil Matoshi, i cili shpërndau raportin 100 ditësh të punës së Qeverisë dhe disa kartolina me anë të të cilave Matoshi ka uruar festat e fundvitit. Me të përfunduar me shpërndarjet e raportit 100 ditësh dhe kartolinat, Matoshi nuk kishte hezituar që ta marrë një kravatë nga grumbulli i kravatave të mbledhura për kryeministrin Haradinaj.

Ditë më parë kryeministri Ramush Haradinaj, arsyetoi rritjen e pagës së zyrtarëve të kabinetit të tij, duke thënë se ndihet i obliguar për ndonjë këmishë apo kravatë për punën e tij zyrtare, mirëpo një gjë e tillë nuk ishte pritur aspak mirë nga qytetarët./Infokusi.com

Vrasja e Lulzim Fejzullahut, vjen reagimi i parë nga ministrja Haxhiu

Sponsoruar