Lajme

Qeveria përcakton marzhën e fitimit të pompave të derivateve

Autori: Gazeta inFokus 15:12 | 28 July 2023

Ministria e Industrisë, Ndërmarrësisë dhe Tregtisë ua ka caktuar të premten marzhën e fitimit prej 2 centë për litër në shitjen me shumicë dhe 12 centë për litër në ato me pakicë pompave të derivateve.

Deri te ky vendim, MINT-i ka thënë se ka ardhur pas monitorimit të rregulltë të çmimeve në tregun e produkteve të naftës, evidencën ditore të pranuar nga Dogana e Kosovës, si dhe raportet e përditshme nga Inspektorati i Tregut, “lidhur me çmimet e shitjes me shumicë dhe pakicë të produkteve të naftës, me ç’rast është evidentuar një rritje e çmimeve e cila nuk reflektohet nga lëvizjet e çmimeve në tregun botëror”.

“Kjo përbën bazë për rregullimin e çmimeve dhe caktimin e masave të tjera mbrojtëse sipas Ligjit Nr.08/L-018 Për Tregtinë me Produkte të Naftës dhe Karburante të Ripërtërishme dhe Udhëzimit Administrativ (QRK) Nr.03/2022 Për Rregullimin e Çmimeve të Produkteve të Naftës dhe Karburanteve të Ripërtëritshme dhe Masat e Tjera Mbrojtëse”, thuhet në njoftim.

-Advertisement-

Sipas këtij vendimi, marzha tregtare maksimale e lejuar e shitjes me shumicë është dy centë për litër kurse marzha tregtare maksimale e lejuar e shitjes me pakicë është 12 centë për litër.

Në Kosovë, çmimi i një litre naftë gjatë ditës së sotme është rreth 1.43 euro, ndërsa 1 litër benzinë është afro 1.47.

Subscribe në YouTube: GAZETA INFOKUSI
Etiketa:
-Advertisement-

Të tjera

Fokusi

lajme