Gazeta Infokus ka raportuar se deputeti i parlamentit Evropian, Nicolas Bay, gjatë qëndrimit të tij tre ditor në Ballkan ka nisur një fushatë të fuqishme propagandistike kundër Kosovës, duke e quajtur atë “djep të Serbisë” e Ushtrinë Çlirimtare të Kosovës, ushtri terroriste.

Në lidhje me këtë ka reaguar drejtori ekzekutiv i Institutit të Kosovës për Drejtësi, Ehat Miftaraj. Ai ka thënë se pavarësisht që kjo fushatë e nisur kundër Kosovës nga euro deputeti është e rreme, ajo paraqet mendimin e tij personal dhe se institucionet në Kosovë nuk duhet të ndërmarrin as edhe një masë kundër tij.

LEXO EDHE: SKANDALOZE: E quan UÇK-në terroriste e Kosovën “djep të Serbisë”, ky është deputeti francez në parlamentin evropian që ka nisur propagandë të fuqishme kundër Kosovës

Miftaraj ka thënë për Infokus se si Evropa ashtu edhe Kosova, kanë vlerë lirinë e shprehjes të cilën duhet ta mbrojnë andaj edhe propaganda e deputetit Bay, mund të merret si liri e shprehjes.

“Edhe përkundër se qëndrimet e tij të shprehura në rrjetet sociale janë propagandë e pastër, shtrembërim i realitetit dhe pa asnjë argument apo bazë të qëndrueshme, që për bazë kanë keqinformimin dhe dezinformimin e grupit të njerëzve që ai përfaqëson apo ka marr besimin e tyre për ti përfaqësuar në parlamentin evropian, Kosova nuk do të duhej të ndërmerrte asnjë veprim ndaj të njëjtit, pasi përmes kësaj do të faktorizonte njëjtin dhe kauzën e tij të rrejshme, por edhe për faktin se edhe përkundër se lajmet që ai i plason janë fake news, të njëjtat mund të hynë në kuadër të lirisë së shprehjes si vlerë e cila mbrohet dhe respektohet si në Bashkimin Evropian ashtu edhe në Republikën e Kosovës”, ka thënë ai.

Ai ka thënë se deklaratat skandaloze të euro deputetit, kurrsesi nuk duhet të shihet si qëndrim zyrtar i parlamentit evropian, por si qëndrime personale në emër të lirisë së shprehjes.

“Parlamenti Evropian ka 705 anëtarë të cilët zgjidhen në mënyrë të drejtpërdrejte.  Në kuadër të Parlamentit Evropian janë shtatë grupe politike të cilët nuk organizohen mbi bazën e nacionalitetit apo shtetit që vinë por në bazë të bindjeve politike, sikurse qëndrimet e tij në rastin konkret shprehin bindjet e tij personale dhe asesi qëndrimin zyrtar të parlamentit evropian apo të ndonjërit prej grupeve  politike në parlamentin evropian”, ka thënë Miftaraj.

Gjatë tre ditëve që euro deputeti Bay qëndroi në Serbi e në Kosovë ai ka bërë afro 21 postime duke e quajtur Kosovën pushtuese e okupatore të territorit serb. Ai madje e ka quajtur dhe qeverinë e Kosovës si rrjedhje të mafias të islamizuar që përdor fëmijët për të valëvitur flamujt në rrugët e Prizrenit./Gazeta Infokus/

Një vit i suksesshëm përtej pritshmërive

Sponsoruar