Lifestyle

Princi Harry, i zhgënjyer nga familja mbretërore

Autori: Gazeta inFokus 13:51 | 26 June 2017

Princi Harry ka qenë aq i zhgënjyer me të qenit pjesë e familjes mbretërore, saqë kishte vendosur të dilte prej saj.

Pasi kishte menduar të hiqte dorë nga titulli, në përfundim ai kishte vendosur se duhej të qëndronte dhe të krijonte një rol për veten.

Duke folur për “Mail on Sunday”, Princi, i pesti në linjën e fronit, tha se hyrja në ushtri kishte qenë shpëtimi i tij. E sipas tij, mbretërorët nuk duan të jenë thjesht një tufë njerëzish të pasur, por duan që ta përdorin pozicionin që mbajnë në të mirë të njerëzve.

-Advertisement-

32-vjeçari Harry ka qëndruar për 10 vite në ushtri, duke shërbyer dy herë në Afganistan. Ai u detyrua të largohej, kur prania e tij atje u bë e ditur në vitin 2007.

“Më erdhi shumë keq. Të qenit në ushtri ishte gjëja më e mirë që mund të më ndodhte. Ndieja se me të vërtetë po arrija diçka”, thotë ai.

Ai është angazhuar më pas në aktivitete bamirësie, përfshirë mbështetjen e veteranëve të lënduar të luftës dhe grupet e shëndetit mendor.

Javën e kaluar, revista “Newsweek” publikoi një intervistë me Princin, në të cilën ai tha se askush në familjen mbretërore nuk e donte fronin.

“Nuk e bëjmë këtë për veten tonë, por për të mirën e njerëzve”, tha ai. “A ka ndonjë në shtëpinë mbretërore që do të jetë Mbret apo Mbretëreshë? Nuk mendoj kështu, por ne do të përmbushim detyrimet tona në kohën e duhur”.

Harry tha po ashtu se ka menduar për drejtimin e ardhshëm të familjes mbretërore. “Ne duam të garantojmë që monarkia të zgjasë, por ajo nuk mund të bëjë përpara ashtu siç ka bërë nën drejtimin e Mbretëreshës Elisabeth II. Duhet të ketë ndryshime. Gjërat po ecin shumë shpejt, veçanërisht për shkak të medias sociale, ndaj ne jemi të përfshirë në modernizimin e monarkisë”.