Sport

“Play off”-et e NBA, Golden State përmbys San Antonion

Autori: Gazeta inFokus 13:36 | 15 May 2017

Golden State nuk rresht kurrë së befasuari. Skuadra kaliforniane arriti të fitojë aktin e parë ndaj San Antonios në finalen e Konferencës së Perëndimit, në NBA, pas një ndeshjeje vërtet të çmendur, pasi realizoi një përmbysje të madhe.

Në “Oracle Arena”, skuadra teksane e drejtuar nga Gregg Popovich e tregoi menjëherë forcën e saj, sidomos në mbrojtje, duke detyruar “Warriors” të humbasin disa sulme në 8 minuta lojë.

Aldridge dhe Leonard ishin të pamëshirshëm dhe, falë pikëve të tyre, San Antonio e mbylli periodën e parë 30-16. Skuadra teksane, me kalimin e minutave e thelloi edhe më shumë këtë diferencë, duke e çuar atë deri në 25 pikë në periodën e dytë.

-Advertisement-

Ajo që ndryshoi fatin e ndeshjes në favor të Golden State ishte rishfaqja e problemeve fizike të Leonard, me këtë të fundit që u detyrua të braktisë parketin për të mos u kthyer më. Në këtë pikë, sulmi i San Antonios nuk ishte më aq “vrasës” sa në fillimin e sfidës, e kjo i dha krahë skuadrës kaliforniane që rihapi llogaritë e ndeshjes falë Stephen Curry e Kevin Durant, duke e reduktuar diferencën në 6 pikë, me basketbollistët që e mbyllën sfidën me 74 pikë të shënuara të dy së bashku.

Minutat e fundit u zhvilluan në ritme shumë të larta, me ekipet që i kundërpërgjigjeshin njëri-tjetrit në çdo pikë të shënuar. Por në fund, ajo që u dorëzua ishte skuadra teksane e Spurs që e la parketin me humbjen 111-113, që mund të ndikojë jo pak në aspektin psikologjik të basketbollistëve të saj në sfidat e radhës.

Subscribe në YouTube: GAZETA INFOKUSI