Sport

Për FFK-në Vllaznia dallon prej Feronikelit

Autori: Gazeta inFokus 14:25 | 05 January 2018

Federata e Futbollit e Kosovës (FFK) nuk u ka dhënë shpresa tifozëve dhe dashamirëve të Vllaznisë së Pozheranit. Shtëpia e futbollit ka paralajmëruar njohjen e fletëlëshimeve që u janë dhënë nga kryesia e klubit gati të gjithë lojtarëve. Para pak kohësh FFK-ja i kishte shpallur jovalide fletëlëshimet që i kishin marrë futbollistët e Feronikelit, duke i lënë ata në Drenas. Sipas FFK-së, rasti i Vllaznisë nuk është i njëjtë me atë të Feronikelit, shkruan sot, gazeta “Zëri”.

Para pak javësh Feronikeli u kishte dhënë fletëlëshime futbollistëve dhe më pas kishte dhënë dorëheqje edhe kryesia e klubit, e cila ishte kërkuar nga kryetari i Komunës së Drenasit, Ramiz Lladrovci. Mirëpo komuna përmes një letre i kishte kërkuar Federatës së Futbollit të Kosovës (FFK) që t’i shpallë të pavlefshme ato fletëlëshime. Kështu edhe kishte vepruar FFK-ja, duke mos i njohur ato fletëlëshime. Shtëpia e futbollit theksonte se nuk ishte e ndikuar politikisht nga Komuna e Drenasit në marrjen e atij vendimi, por kishte vepruar mbi baza profesionale. Vendimin për mosnjohjen e fletëlëshimeve që kishin marrë lojtarët e Feronikelit FFK-ja e kishte arsyetuar me qëllimin për ta ruajtur interesin e klubit nga Drenasi, mbrojtjen e futbollistëve dhe ruajtjen e integritetit të garave të Superligës.

Mirëpo FFK-ja deri më tani nuk ka reaguar njëjtë në rastin e fundit që ndodhi në Superligën e Kosovës, ku një tjetër klub elitar u dha fletëlëshime gati të gjithë futbollistëve. Fjala është për Vllazninë e Pozheranit, e cila i ka liruar gati të gjithë futbollistët, duke përfshirë edhe emrat më të njohur që kishte në skuadër, si: Maliq Behlulin, Festim Alidemajn, Alban Shillovën, Festim Krasniqin, Rron Statovcin, Albert Stubllën, Fuad Karabegun, Erdin Hashanin, Armend Kastratin, Bergin Maliqin, Alban Rexhepin, Shkumbin Salihin, Elbasan Thaçin, etj. Ndërkohë, nga Pozherani janë larguar edhe disa anëtarë të bordit. “Rasti i Feronikelit dallon me këtë të Vllaznisë. Komuna e Drenasit dhe klubi i Feronikelit patën ndërmarrë masa menjëherë pasi ish-kryesia u kishte dhënë fletëlëshime. Kurse nga Vllaznia e Pozheranit kryesia nuk është larguar”, thotë FFK-ja. “Përpos kësaj, tani jemi në aftin kalimtar të janarit. Jemi në fazën e marrëveshjeve në mes klubeve dhe futbollistëve. Po ashtu kur lojtarët nuk marrin paga për dy muaj ata kanë të drejtë të largohen prej klubeve që nuk ua kryejnë obligimet. Sidoqoftë, fletëlëshimet që kanë marrë futbollistët e Vllaznisë do të verifikohen nga komisionet përkatëse të Federatës dhe nëse vërtetohet ndonjë parregullsi atëherë ne do të reagojmë”, ka theksuar FFK-ja për “Zërin”.

-Advertisement-

Subscribe në YouTube: GAZETA INFOKUSI
Etiketa:
Viva Fresh Store triumfon në çmimet Best Buy Award 2024/2025 në Kosovë!
-Advertisement-

Të tjera

Fokusi

sport