Lajme

Një polic i Kosovës denohet me një vit burgim, kjo është arsyeja

Autori: Gazeta inFokus 12:09 | 12 October 2022

Nexhmedin Grajqevci është dënuar me një vit burgim efektiv për veprën penale lëndim i rëndë trupor, ndërkaq ndaj të akuzuarit Skënder Nasufit janë refuzuar akuzat për veprën penale lëndim i rëndë trupor dhe keqtrajtimi gjatë ushtrimit të detyrës.

Shpallja e aktgjykimit ndaj të akuzuarve është bërë të mërkurën, në Gjykatën Themelore në Prishtinë nga gjykatësja Donika Shala-Avdyli

Sipas aktgjykimit për të akuzuarit Grajqevci dhe Nasufi është refuzuar vepra penale “Keqtrajtimi gjatë ushtrimit të detyrës”, me arsyetimin se kjo vepër penale ka arritur parashkrimin absolut të ndjekjes penale.

-Advertisement-

Ndërkaq për veprën penale “Lëndim i rëndë trupor”, ndaj të akuzuarit Garajqevci është shqiptuar dënim me burgim efektiv prej një viti.

Ndërsa për veprën e njëjtë penale ndaj të akuzuarit Nasufi është refuzuar akuza për shkak të tërheqjes së prokurores nga ndjekja penale.

Gjithashtu i akuzuari Grajqevci obligohet që në emër të paushallit gjyqësorë të paguaj shumën prej 30 euro, si dhe 30 euro për fondin e kompensimit të viktimave të krimit.

Sipas gjykatëses Shala-Avdyli palët e pakënaqura kundër këtij aktgjykimi kanë të drejtë në ankesë në afat prej 15 ditësh nga dita e pranimit të aktgjykimit.

Sipas aktakuzës së ngritur më 13 mars 2015, të pandehurit Skënder Nasufi dhe Nexhmedin Grajqevci thuhet se më 21 nëntor 2012, në lagjen “Dardania” në parkingun e restorantit “Villa Natyra” në Prishtinë, në bashkëkryerje, gjatë arrestimit të tani të dëmtuarit B.K, sipas planit operativ të zhvilluar nga Inspektorati Policor i Kosovës (IPK) dhe Policia e Kosovës, gjatë ushtrimit të detyrës kanë tejkaluara autorizimet, duke keqtrajtuar të dëmtuarin.

Sipas prokurorisë, të pandehurit ngarkoheshin se kanë kryer veprën penale “Keqtrajtimi gjatë ushtrimit të detyrës”.

Në dispozitivin e dytë të aktakuzës thuhet se Nasufi dhe Grajqevci në kohën dhe vendin e lartcekur, gjatë arrestimit të tani dëmtuarit B.K sipas planit operativ të zhvilluar nga IPK-ja dhe Policia e Kosovës, i kanë shkaktuar të dëmtuarit lëndime të rënda trupore dhe atë thyerje të gjurit të këmbës së majtë.

Me këtë, ngarkoheshin se kanë kryer veprën penale “Lëndim i rëndë trupor”. /BetimipërDrejtësi

Subscribe në YouTube: GAZETA INFOKUSI