Lajme

Nga sot ndryshon çmimi i biletës në transportin publik në Prishtinë

Autori: Gazeta inFokus 08:37 | 31 January 2023

Komuna e Prishtinës ka bërë të ditur se nga sot është bërë riorganizimi i planit tarifor të transportit publik, me ç’rast do të ndryshojë edhe çmimi i biletës në transportin publik, shkruan Gazeta Infokus.

Përmes një njoftimi nga kjo komunë kanë bërë të ditur se çmimi i biletës mujore nga 14.00 Euro do të zbresë në 13.50 Euro.

“Kartelat javore dhe mujore mund t’i blini në pikat e shitjes së Trafikut Urban: Kioska me logon e Trafiku Urban, prapa Objektit të Komunës së Vjetër (tek “Plepat”), Kioska me logon e Trafiku Urban, në lagjen Kodra e Diellit, tek ”Banesat e Bardha”, thuhet në njoftimin e komunës.

-Advertisement-

Ndryshe kanë bërë të ditur se një biletë e rregullt autobusi, e cila mund të përdoret vetëm për një drejtim, do të ketë çmimin 0.50€, ndërkaq bileta ditore ndërsa ajo ditore e cila përfshinë vajtje-ardhje pa limit përgjatë 24 orëve do të jetë 80 cent.

“Në anën tjetër, për t’iu përshtatur nevojave të të gjithë qytetarëve, kemi përfshirë në planin tarifor biletat javore dhe ditore shumë përdorimëshe: Bileta Ditore përfshin udhëtime vajtje-ardhje pa limit përgjatë 24 orëve, me çmimin 0.80€ dhe Bileta Javore përfshin udhëtime vajtje-ardhje pa limit në të gjitha ditët e javës, me çmimin 4.00€”, thuhet tutje në njoftim.

Kujtojmë që bileta njëdrejtimëshe dhe ajo ditore 24 orëshe mund t’i blini si zakonisht në autobus, duke u pajisur me kupon fiskal.

Ky riorganizim është bërë në kuadër të Marrëveshjes së Kredisë mes Trafiku Urban Prishtinë dhe Bankës Evropiane për Rindërtim dhe Zhvillim (BERZh), me qëllim të përmirësimit të shërbimit të transportit publik dhe inkurajimit të qytetarëve për përdorimin e autobusëve. /Gazeta Infokus/

Subscribe në YouTube: GAZETA INFOKUSI