Lajme

Në Serbi e pranojnë se tërheqjet e njohjeve për Kosovën, po bëhen me para

Autori: Gazeta inFokus 09:54 | 11 July 2018

Ivica Daçiq po krenohet më tërheqjen e pretenduar të njohjeve për Kosovën, nga vendet që nuk e kanë ndonjë ndikim ndërkombëtar. Kjo nuk ka ndonjë peshë në dialog dhe e pengon zgjidhjen e problemeve me Kosovën
Kështu ka thënë për gazetën serbe Danas, drejtori i Qendrës për Rajonalizim të Novi Sadit, Aleksandar Popov.

Reagimi i tij erdhi pas përplasjeve të Daçiqit me ministrin Pacolli, të cilët po zhvillojnë një “luftë diplomatike”.

Popov thotë se Daçiq po përpiqet ta sfidojë pavarësinë e Kosovës, përkundër se vendet që pretendohet se po tërheqin njohjet kanë dërguar mesazhe kontradiktore, transmeton lajmi.net.

-Advertisement-

Ai kujton rastin e fundit me Liberinë ku në Serbi u tha se ky vend nuk e njehë më Kosovën, kurse liderët e këtij shteti thonë pastaj se nuk është e vërtetë.

“Kjo gjë nuk do të ndikojë në arritjen e një marrëveshje përfundimtare ndërmjet Serbisë dhe Kosovës, pasi që Brukseli nuk i merr parasysh. Por mendoj se kjo konsumon shumë energji dhe të holla, pasi nuk e dijmë se si po lobohet për tërheqjen e njohjeve”, tha Popov.

Ai tha se ka vende ku demokracia është pak e zhvilluar, dhe normalisht që me para mund të synohet realizimi i qëllimeve politike.

Kurse Zivadin Jovanoviq një ish-ministër i jashtëm i ka dalur në krahë Daçiqit, duke thënë se në të ardhmen edhe shtetet më serioze do ta shqyrtojnë njohjen për Kosovën.

Sipas tij, Daçiq dhe Pacolli nuk mund ta akuzojnë njëri-tjetrin kur është fjala për ryshfet dhe korruptim.

Ndryshe ditëve të fundit në Serbi ka pasur moblizim që shtetet sidomos afrikane ta tërheqin njohjen për Kosovën.

Në anën tjetër shefi i diplomacisë kosovare, Behgjet Pacolli gjatë një raportimi për Komisionin e Punëve të Jashtme, ka bërë të ditur se Serbia po investon para të majme te këto shtete, në mënyrë që ato ta tërheqin njohjen për Kosovën.

Subscribe në YouTube: GAZETA INFOKUSI