Lajme

Në Ferizaj shënohet Dita Botërore e Ujit

Autori: Gazeta inFokus 15:31 | 22 March 2018

Për nder të Ditës Ndërkombëtare të Ujit, në Ferizaj u mbajt takim sensibilizues me nxënës të shkollave fillore të kësaj komune.

Kryesuesja e Kuvendit të Komunës, Kristina Gashi Bytyçi tha se qytetarëve të Ferizajt do t’I sigurohet furnizimi I rregullt me ujë të pijshëm, si dhe duke investuar në ndërtimin e fabrikave të përpunimit të ujit në disa pjesë të Ferizajt, shkruan Infokusi.

“Është tejet e rëndësishme të ruhen dhe kujdesemi për burimet e ujit, për shkak se ato paraqesin burimin e jetës. Detyrë e prindërve dhe e mësimdhënësve është edukimi dhe mësimi për të gjithë fëmijët për rëndësinë që ka ruajtja dhe kujdesi ndaj pasurive ujore, theksoi Gashi – Bytyçi.

-Advertisement-

Sipas njoftimit të komunës, në këtë takim u prezantuan edhe dy punime, njëri mbi gjendjen hidrografike në territorin e Komunës së Ferizajt si dhe monitorimi i cilësisë së ujit të ujësjellësit në Regjionin e Ferizajt, prezantim ky i bërë nga përfaqësuesi i Institutit të Shëndetit Publik në Ferizaj. Pati edhe pyetje për organizatorët nga nxënësit e shkollave fillore lidhur me problemet e ujit në Ferizaj.

Ky aktivitet u organizua nga Kompania Rajonale e Ujësjellësit dhe Kanalizimit “Bifurkacioni” dhe Komuna e Ferizajt me moton “Uji për Natyrën”.

Ndërkaq, pas përfundimit të këtij takimi, aktiviteti për shënimin e kësaj dite vijoi me një vizitë tek burimi i ujit në Jezerc me ç‘rast u zhvillua një aktivitet simbolik. /INFOKUSI.COM/

Subscribe në YouTube: GAZETA INFOKUSI