Lajme

Molliqaj: Pas sulmit terrorist, Kurti po ia bën dhuratë Vuçiqit Asociacionin

Autori: Gazeta inFokus 22:48 | 26 October 2023

Kryetari i PSD-së, Dardan Molliqaj, ka akuzuar kryeministrin Albin Kurti për formimin e Asociacionit të komunave me shumicë serbe, duke e quajtur këtë një dhuratë për presidentin serb, Aleksandar Vuçiq, pas sulmit terrorist të 24 shtatorit

“Mbas edhe asaj që e quajtën një zhvillim dramatik i 24 shtatorit, tash dhuratë presidentit të Serbisë po ia bëjnë Asociacionin”.

Kështu ka deklaruar kryetari i Partisë Social Demokrate (PSD), Dardan Molliqaj, duke pretenduar se kryeministri i Kosovës, Albin Kurti, e ka pranuar formimin e Asociacionit të komunave me shumicë serbe.

-Advertisement-

Në Debat Plus, Molliqaj ka deklaruar se procesi i formimit të Asociacionit të Komunave me shumicë serbe po bart përgjegjësitë më të mëdha në duar të autoriteteve të Beogradit.

Ai ka thënë se kjo do ta çojë në një pozicion më të dobët Kosovën, duke e larguar atë nga procesi i integritetit të saj territorial.

“Është duke vrapuar me nënshkru draftin e Asociacionit që e paska pranuar formalisht publikisht. Ky është lajmi keq për Kosovën, jo vetëm për shkak që e bëri Kurti, por kushdo që do ta bënte këtë, sepse ky institucion do t’u bartet serbëve të Kosovës, të cilët janë më larg nga institucionet dhe integrimi i Kosovës në krejt historinë e Kosovës. Domethënë kurrë ma larg serbët nuk kanë qenë të shtetit të Kosovës dhe ti po jua bart një pushtet të fuqishëm që për ne dhe për secilin që do me lexu është autonomi, ata mund ta quajnë si duan me emër, por është autonomi territoriale politike, është identitetet politik në Kosovë”, ka deklaruar ai.

Molliqaj gjithashtu ka akuzuar kryeministrin Kurti se po e kryen këtë proces për qëllime personale dhe për ta mbajtur kredibilitetin dhe popullaritetin e tij në opinionin publik.

Ai ka theksuar se veprimet e Kurtit deri më tani kanë pasur më shumë pasojë negative sesa pozitive për Kosovën.

“Prandaj, unë besoj që Kurti paraqet rrezik, sepse krejt bilancin nëse duam të bëjmë të veprimeve të tij në dialog kanë qenë vetëm sa për ta ruajtur kredibelitetin e tij, popullaritetin e tij dhe mbështetësit e vet. Përndryshe, nëse e shikon procesin tash që i erdhi fundi, e kupton që Kosova nuk ka fituar asgjë prej veprimeve të tij, ka vetëm minusa”, ka deklaruar Molliqaj.

Subscribe në YouTube: GAZETA INFOKUSI