Sport

Maqedonia e Veriut, premio marramendëse për të mundur Kosovën në Ligën e Kombeve

Autori: Gazeta inFokus 19:00 | 20 November 2019

Lojtarëve të ekipit kombëtar të Maqedonisë së Veriut u është premtuar një shpërblim i majmë parash prej tre milionë euro nga Federata e Futbollit e vendit të tyre, nëse arrijnë ta sigurojnë kualifikimin në Euro 2020 duke e mposhtur Kosovën në gjysmëfinalen e “play-off” të Ligës D të Kombeve.

Për ta arritur qëllimin dhe rrjedhimisht për ta merituar shpërblimin, lojtarëve të Maqedonisë së Veriut u duhet të mposhtin së pari Kosovën në gjysmëfinale dhe pastaj edhe fituesin e duelit tjetër gjysmëfinal mes Bjellorusisë dhe Gjeorgjisë në muajin mars.

Njëlloj si Kosova, edhe Maqedonia e Veriut dështoi ta sigurojë pjesëmarrjen në turneun e verës së ardhshme përmes kualifikimeve, duke u renditur në vendin e tretë në grupin e saj.

-Advertisement-

Federata e Futbollit e Maqedonisë (FFM), e udhëhequr nga kryetari i saj shqiptar, Muhamed Sejdini, është shumë e kënaqur me rezultatin, siç e ka quajtur historik, të ekipit kombëtar dhe tani i ka motivuar lojtarët ta arrijnë synimin kryesor, kualifikimin.

“Do të doja të përcjell urime të sinqerta për futbollistët e ekipit tonë përfaqësues për paraqitjet dhe rezultatet e shënuara në ciklin e fundit eliminator për EURO 2020. Është shumë me rëndësi që futbollistët besojnë se munden, janë të vetëdijshëm për kualitetin që posedojnë, ndërsa me mbështetjen e publikut janë të gatshëm për rezultate të mëdha. Duhet të vazhdojmë të besojmë në vetvete”, tha mes tjerash Sejdini.

“Dua të theksoj se FFM në rast të kualifikimit në Euro 2020, lojtarëve do t’u ndajë premio më shumë se 3 milionë euro. Saktësisht 30% të shumës që FFM do të fitojë nëse kualifikohemi, do të shkojnë për anëtarët e Kombëtares sonë”, tha Sejdini.

Subscribe në YouTube: GAZETA INFOKUSI