Ditë më parë u bë e ditur se INTERPOL ka përfshirë në listë të kuqe Milan Radoiçiqin, ish nënkryetar i Listës Serbe, i dyshuar kryesor për sulmin e armatosur në Banjskë të Zveçanit.

Lajmin për Telegrafin e kishte konfirmuar edhe ministri për Komunitete dhe Kthim, Nenad Rashiq.

Ministri Rashiq bëri të ditur për Telegrafin se urdhri për flet-arrest është lëshuar me ndërmjetësimin e UNMIK-ut, në bazë të kërkesës së Ministrisë së Punëve të Brendshme të Kosovës.

Lidhur me këtë flet-arrest, Telegrafi ka kontaktuar me INTERPOL, të cilët kanë deklaruar se nuk komentojnë për raste ose individë të veçantë.

“Ju lutemi vini re se Organizata nuk komenton për raste ose individë të veçantë, ju këshillojmë të kontaktoni autoritetet përkatëse kombëtare”, thuhet në përgjigjen e INTERPOL për Telegrafin.Tutje INTERPOL ka shtuar se nuk lëshon udhër-arreste por alarme ndërkombëtare që njihen “Red Notices”.

“Për informacionin tuaj të përgjithshëm, INTERPOL nuk lëshon urdhër-arreste, me kërkesë të vendeve anëtare dhe pas kontrolleve të pajtueshmërisë INTERPOL lëshon alarme ndërkombëtare në kërkim të njohur si ‘Red Notices’”, kanë deklaruar nga INTERPOL-i.

Çka është “Red Notice” që INTERPOL-i i lëshon për personat në kërkim

Në njoftimin e INTERPOL-it thuhet se një “Red Notice” paralajmëron policinë në mbarë botën për të arratisurit e kërkuar ndërkombëtarisht

“Kriminelët mund të ikin në një vend tjetër në përpjekje për t’i shmangur drejtësisë. Një “Red Notice” paralajmëron policinë në mbarë botën për të arratisurit e kërkuar ndërkombëtarisht”.

Një “Red Notice” është një kërkesë për zbatimin e ligjit në mbarë botën për të gjetur dhe arrestuar përkohësisht një person në pritje të ekstradimit, dorëzimit ose veprimeve të ngjashme ligjore.

“Ai bazohet në një urdhër arresti ose një urdhër gjykate të lëshuar nga autoritetet gjyqësore në vendin kërkues.

Vendet anëtare zbatojnë ligjet e tyre për të vendosur nëse do të arrestojnë një person”, thuhet më tutje në ueb-faqen e INTERPOL-it.

“Red Notice” përmban dy lloje kryesore të informacionit:

Informacion për identifikimin e personit të kërkuar, si emri, data e lindjes, kombësia, ngjyra e flokëve dhe syve, fotografi dhe shenja gishtash nëse ka.

Informacion në lidhje me krimin për të cilin ata kërkohen, i cili zakonisht mund të jetë vrasje, përdhunim, abuzim me fëmijët ose grabitje me armë.

“Red Notice” publikohen nga INTERPOL me kërkesë të një vendi anëtar dhe duhet të jenë në përputhje me Kushtetutën dhe Rregullat e INTERPOL-it.

Një “Red Notice” është një alarm ndërkombëtar për një person të kërkuar por nuk është një urdhër arrest.

Pse janë të rëndësishme “Red Notice”?

“Red Notice” janë të rëndësishme sepse përdoren për të njoftuar njëkohësisht policinë në të gjitha vendet anëtare për të arratisurit e kërkuar ndërkombëtarisht.

“Red Notice” ndihmojnë në sjelljen e të arratisurve para drejtësisë, ndonjëherë shumë vite pas kryerjes së krimit origjinal.

A janë personat e kërkuar nga INTERPOL-i?

Jo, ata kërkohen nga një vend ose një gjykatë ndërkombëtare.

INTERPOL nuk mund të detyrojë autoritetet e zbatimit të ligjit në asnjë vend të arrestojnë dikë që është subjekt i një “Red Notice”.

Çdo vend anëtar vendos se çfarë vlere ligjore i jep një “Red Notice” dhe autoritetit të oficerëve të tij të zbatimit të ligjit për të kryer arrestime.

Kush janë subjekt i “Red Notice”

“Red Notice” lëshohen për të arratisurit që kërkohen ose për ndjekje penale ose për të vuajtur një dënim në lidhje me krime të rënda si vrasje, përdhunim dhe mashtrim. Kjo pason procedimin penal në vendin që ka lëshuar kërkesën. Kjo nuk është gjithmonë vendlindja e individit.

Kur një person kërkohet për ndjekje penale, do të thotë se personi nuk është dënuar dhe duhet të konsiderohet i pafajshëm derisa të provohet fajësia. Një person që kërkohet të vuajë një dënim do të thotë se ky person është shpallur fajtor nga një gjykatë në vendin që ka kërkuar publikimin e “Red Notice”.

Por, INTERPOL, për flet-arrestimit për ish-nënkryetarin e Listës Serbe dhe biznesmenin kontrovers Milan Radoiçiq, ka lëshuar flet-arrest dhe për 11 persona të tjerë për sulmin e armatosur në Banjskë më 24 shtator.

Mirëpo, përveç tyre, në listën e kuqe të fletarrestimeve të INTERPOL-it janë edhe 20 persona me shtetësi serbe.

Uglesha Jarediq, ish-shefi i Njësive Speciale të Policisë së Kosovës, është njëri nga 20 personat që hyjnë në listën e të kërkuarve nga organizata më e madhe ndërkombëtare e policisë, INTERPOL.Edhe Jarediq ka emrin në listë në lidhje me sulmin terrorist në Banjskë të Zveçanit.

Ish-shefi i Njësive Speciale të Policisë së Kosovës në regjionin e veriut, Uglesha Jarediq, është identifikuar në mesin e personave që ishte i përfshirë në rastin e Banjskës.

Në një dokument që Ministria e Punëve të Jashtme e Kosovës e ka dorëzuar tek institucionet e Kosovës, emri i Jarediqit përmendet si i përfshirë në këtë rast.

Për të dokumentuar përfshirjen e tij Ministria ka përdorur një fotografi ku Jarediq shihet në një makinë bashkë me dy persona të tjerë.

Jarediq kishte udhëhequr Njësinë Speciale në Mitrovicën Veriore deri pak javësh, para se policët të ofronin dorëheqje masive.

Ndërkaq, avokati, Eset Berisha ka thënë se me Kodin e Ri të Procedurës Penale lejohet edhe zhvillimi i procedurës penale në mungesë të personave të caktuar.

Ai ka thënë se Kosova mund ta gjykojë Milan Radoiçiqin edhe në mungesë.

“Republika e Kosovës i ka të gjitha mundësitë për të zhvilluar hetim të mirëfilltë, në pajtim me legjislacionin penal që ka në fuqi, ta zhvillojë procedurën penale. Tanimë me kodin e ri të Procedurës Penale lejohet edhe zhvillimi i procedurës penale në mungesë të personave të caktuar, pa asnjë pengesë, dhe mund të shkojë deri në aktgjykim të formës së prerë dhe prapë të kërkojë nga INTERPOL-i ekzekutimin e atij aktgjykimi”, ka deklaruar Berisha në RTV Dukagjini.

Berisha ka thënë se gjykimin në mungesë, Këshilli i Evropës, përmes konventës së tyre e parasheh si mundësi, por jo edhe si një praktikë të mirë.

BKT Kosova synon të rrisë ndërgjegjësimin lidhur me çrregullimet e spektrit të autizmit në Ditën Botërore të Ndërgjegjësimit për Autizmin

Sponsoruar