Sport

Luis Enrique: Dua të rigjej ritmin e jetës, Moreno u tregua i padrejtë

Autori: Gazeta inFokus 13:30 | 27 November 2019

Luis Enrique u rikthye në pankinën e Spanjës, pasi kaloi momentin e vështirë me humbjen e të bijës disa ditë më parë, ndërsa sqaroi sot për herë të parë edhe vendimin për largimin e Roberto Morenos, që pasi u shkarkua si trajner, nuk u mbajt as në stafin teknik.

“Sot është një ditë e veçantë për mua dhe familjen time. Sa i përket Morenos, i vetmi që nuk ka lidhje me largimin e tij, jam unë. E kam takuar vetëm më 12 Nëntor në shtëpinë time dhe më tha se kishte menduar të drejtonte skuadrën në Europian dhe më pas të largohej po të ishte nevoja.

E kuptoj që është ambicioz, por për mua është e padrejtë. Ambicia e tepruar për mua nuk është virtyt, por defekt. Po të isha në vendin e tij, nuk do të sillesha në të njëjtën mënyrë.

-Advertisement-

Jam këtu sepse drejtuesit e federatës vendosën të më thërrasin, ndaj nuk dua të tregoj asnjë histori tjetër. Nga ana profesionale nuk kam asgjë për të thënë për Morenon, pasi është një trajner i mirë, por nga ana njerëzore nuk kam dyshuar asnjëherë, derisa më faktoi të kundërtën.

Megjithatë janë situata që nuk dua t’i kujtoj”, deklaroi Luis Enrique.

Ish trajneri i Barcelonës vendosi të lërë detyrën si trajner i Spanjës në fillim të edicionit eliminator të Euro 2020-ës, pasi vajza e tij 9-vjeçare, Ksana po luftonte me një sëmundje të rëndë, që i mori jetën më 29 gusht të këtij viti.

Vetë Luis Enrique pranoi se dëshiron të kapë ritmin e jetës, pas kësaj ngjarjeje të rëndë, ndërsa shtoi se skuadra do të shkojë në Europian me stofin e pretendentes kryesore për ta fituar trofeun këtë edicion.

“Doja shumë të rigjeja ritmin e jetës time, ndaj falënderoj shumë drejtuesit e federatës, që më kanë suportuar vazhdimisht dhe vendosën të më besojnë sërish këtë detyrë, që e njoh në mënyrë perfekte. Spanja u kualifikua pas një edicioni eliminator mjaft të mirë dhe jam shumë i entuziazmuar për mundësinë që do kemi të përfaqësohemi në Euro 2020. Pjesa më e madhe e lojtarëve që do të vijnë, kanë qenë edhe tani në eliminatore, por varet se në çfarë forme do jenë deri para nisjes së kampionatit. Mund të them vetëm se Spanja do të jetë sërish një nga pretendentet kryesore për të fituar këtë kompeticion”, tha tekniku spanjoll.

Subscribe në YouTube: GAZETA INFOKUSI
Etiketa:

Të tjera

Fokusi

sport