Sport

“Luaja këmbëzbathur në zhavorr”, tërhiqet “ish”-i i Arsenalit dhe Barçës

Autori: Gazeta inFokus 10:24 | 15 November 2023

Alex Song e ka mbyllur me futbollin aktiv. Mesfushori me tipare mbrojtëse, luajti gjatë karrierës së tij me klube si Arsenali dhe Barcelona, teksa zhvilloi 49 ndeshje me kombëtaren e Kamerunit (2008-2014).

Me katalanasit fitoi një titull dhe një Superkupë Spanje, ndërkohë që më shumë ndeshje zhvilloi me Gunners. Plot 204 gjatë 7 viteve të kaluara në Londër.

Gjatë karrierës së tij, Song u aktivizua edhe me francezët e Bastias. Anglezët e West Ham dhe Charlton, rusët e Rubin Kazan dhe zviceranët e Sionit.

-Advertisement-

Sezonet e fundit të karrierës 19-vjeçare, ai i kaloi në nivele të ulëta: në Xhibuti me skuadrën AS Arta/Solar7.

Me anë të një postimi në rrjetet sociale, 36-vjeçari afrikan shkruan: “Me pikëllim të madh ju njoftoj se ka ardhur momenti të var këpucët në gozhdë.

Udhëtimi im që filloi në Yaounde si fëmijë – duke luajtur pa këpucë futbolli, me këmbë të zbathura dhe në zhavorr të fortë – më dha forcë dhe guxim për të patur sukses.

Kur u transferova në Francë, duke luajtur për Bastian, mendova se kisha arritur një mrekulli. Megjithatë, ky ishte vetëm fillimi, pasi rrugëtimi im vazhdoi drejt Arsenalit dhe Barcelonës, dy nga klubet më të mëdha në botë“.