Çështja e liberalizimit të vizave për qytetarët e Kosovës është një proces i zvarritur padrejtësisht, shkruan Gazeta Infokus.

Kështu po e konsideron profesori universitar i marrëdhënieve ndërkombëtare, Arben Fetoshi, i cili në një prononcim për Gazetën Infokus është shprehur pozitiv në lidhje me vendimin që mund të merret për liberalizimin e vizave.

Ai tha se sot fillon përmbyllja e procesit për liberalizimin e vizave e ku kjo procedurë mund të marrë edhe disa muaj deri në përfundim.

“Besoj se sot fillon përmbyllja e procesit për liberalizimin e vizave, procedura e të cilit mund të marrë edhe disa muaj, varësisht nga vullneti politik në BE. Ky ishte një proces i zvarritur padrejtësisht, prandaj presidenca çeke e ka arsyetuar me kredibilitetin e unionit. Nëse do të ketë vullnet politik vendimi mund të përshpejtohet, sepse Parlamenti dhe Komisioni ka vite që e kanë konfirmuar mbështetjen”, ka deklaruar Fetoshi për Infokus.

Po ashtu ai shtoi se hezitimet e disa shteteve kanë lënë që të nënkuptohet se çështja po përdorej për presion në kuadër të dialogut me Serbinë.

LEXO EDHE: Festë e shampanja të hapura: Sa herë iu liberalizuan vizat Kosovës deri më sot?

“Zhvillimet intensive në dialog dhe rënia e kredibilitetit të BE-së në rajon. Hezitimet e disa shteteve anëtare kanë lënë të nënkuptohet se çështja po përdorej për presion në kuadër të dialogut me Serbinë, edhe deklarata e Gjermanisë, Francës dhe Polonisë e tregoi qartësisht këtë. Prandaj, mendoj se tani lëvizet drejt vendimit në mënyrë që BE-ja të rikthejë besueshmërinë në këtë fazë të intensifikimit të përpjekjeve për përmbylljen e dialogut”, shtoi Fetoshi për Infokus.

Ndërkaq sipas tij procedurat për liberalizimin e vizave kërkon që në vazhdim të ndodh trialogu mes Parlamentit, Komisionit dhe Këshillit.

“Sot fillon përmbyllja. Procedura kërkon që në vazhdim të ndodhë trialogu mes Parlamentit, Komisionit e Këshillit, pastaj të ndryshohet rregullorja për lëvizjen e lirë, të miratohet në Parlament dhe të shpallet në gazetën zyrtare. Njëzet ditë pas shpalljes në gazeten zyrtarë, qytetarët e Kosovës do të mund të fillojnë udhëtimin pa viza në zonën Schengen”, potencoi Fetoshi për Infokus.

LEXO EDHE: Liberalizimi i vizave: A do të jetë sot dita historike për Kosovën?

Ndërkaq, procesi i liberalizimit të vizave ndërmjet Kosovës dhe Bashkimit Evropian ka filluar që nga viti 2012 e që ende nuk është finalizuar.

Qytetarët e Kosovës janë të vetmit në rajon të cilët nuk kanë të drejtën e lëvizjes pa viza në zonën Schengen. Kjo pasi vendit me 1.8 milionë banorë ende nuk i janë liberalizuar vizat edhe pse ndonëse qysh prej pesë vjetësh Komisioni Evropian ka konfirmuar që Kosova i ka plotësuar të gjitha kriteret për liberalizim./Gazeta Infokus/

Keiretsu Forum Southeast Europe dhe BKT Kosova, një bashkëpunim i guximshëm për herë të parë në llojin e tij, në…

Sponsoruar