Emisari i posaçëm Miroslav Lajçak ka njoftuar se është takuar me dy zyrtarë të Shtëpisë së Bardhë- zëvendës këshilltarin për Siguri Kombëtare, Jon Finer dhe drejtoreshën e Lartë për Evropën, Amanda Sloat.

Ata kanë biseduar për situatën në Veri, hapat e nevojshëm për de-eskalim dhe rrugën për dialogun e ndërmjetësuar nga BE.

“Një takim shumë i dobishëm me zëvendës këshilltarin kryesor për Siguri Kombëtarë të SHBA-së, Jon Finer dhe Drejtoreshën e Lartë për Evropë, Amanda Slot, për situatën në Veri, hapat e nevojshëm për de-eskalim dhe rrugën përpara në dialogun e lehtësuar nga BE”, ka shkruar Lajçak.

Po dje, Lajçak, ka njoftuar se është takuar  edhe me Nënsekretaren amerikane të Shtetit, Victoria Nuland, me të cilën ka folur lidhur me situatën në veri të vendit dhe gjetjen e një rrugëdalje, shkruan Gazeta Online Reporteri.net.

Përmes një postimi në Twitter, Lajçak ka thënë se kanë rënë dakord për rëndësinë e de-përshkallëzimit të situatës dhe kthimit në dialogun e ndërmjetësuar nga Bashkimi Evropian.

“Pata një bisedë shumë të mirë me nënsekretaren amerikane të Shtetit, Victoria Nuland. Ndamë të njëjtin vlerësim për situatën në veri të Kosovës dhe zgjidhjen e saj. U pajtuam për rëndësinë e de-përshkallëzimit të menjëhershëm dhe kthimit në dialogun e ndërmjetësuar nga BE”, ka shkruar Lajçak.

Gjatë ditës së djeshme, i dërguari i posaçëm i ShBA-së për Ballkanin Perëndimor, Gabriel Escobar, së bashku me të Dërguarin Special të Bashkimit Evropian për dialogun Kosovë-Serbi, Miroslav Lajçak, në një intervistë dhënë për “Atlantic Council” u shprehën të shqetësuar për situatën në veri të Kosovës.

Emisari amerikan, Escobar ka thënë se është shumë i brengosur për situatën, e sipas tij kjo mund të shndërrohet në një konflikt rajonal.

“Jam shumë i brengosur, ka mundësi që të shndërrohet në konflikt rajonal. Ata duhet të pranojnë marrëveshjen evropiane në këtë drejtim, ata kanë pranuar planin nuk ka opsion tjetër përveç de-eskalimit të situatës dhe kthimin në tryezën e bisedimeve. Më duhet të them se bashkësia ndërkombëtare është shumë e bashkuar në këtë drejtim”, tha Escobar në një paraqitjen me Ilva Taren.

Edhe Përfaqësuesi Special i BE-së, Miroslav Lajçak tha se prioritet është shtensionimi i situatës në komunat veriore, de-eskalimi i dhunës dhe kthimi te procesi i normalizimit, përfshirë këtu mbajtjen e zgjedhjeve, ndërsa theksoi se nuk mund ta përballojnë të ketë viktima, nëse situata nuk shtensionohet.

“Nëse nuk arrijmë ta shtensionojmë, do të kemi viktima. Këtë s’mund ta përballojmë atë”, deklaroi Lajçak.

Spektakli i Vitit, Ekskluzivisht në Artmotion – BBVK3!

Sponsoruar