Lajme

Kurti flet për sulmin në Banjskë: Për sa kohë që fqinjët e Serbisë nuk janë pjesë e BE-së, ata nuk janë të sigurt prej saj

Autori: Gazeta inFokus 18:33 | 11 November 2023

Kosova po përballet me kërcënime të sigurisë nga jashtë, veçanërisht nga Serbia, tha kryeministri i Kosovës Albin Kurti në ditën e dytë të Forumit të Paqes në Paris.

Kurti përmendi sulmin në Banjskë, duke theksuar se ai ishte një arsyetim për hyrjen e ushtrisë serbe në Kosovë.

“Nuk ka vetëm kërcënime të brendshme për sigurinë, por ka edhe kërcënime të jashtme për sigurinë dhe kjo ka të bëjë me kohën gjeopolitike që po kalojmë, dhe nga ana tjetër ka të bëjë me fqinjin tonë verior që nuk e njeh Kosovën. Para më pak se dy muajsh e patëm këtë sulm nga një grup paramilitar terrorist nga Serbia në veri të vendit tonë. Ata vranë një polic të Kosovës dhe donin të shkaktonin një përshkallëzim të madh për të krijuar kaos total si arsyetim për hyrjen e ushtrisë serbe në Kosovë”, tha ai.

-Advertisement-

Kurti ka shtuar se Kosova ka vetëm një alternativë, anëtarësimin në Bashkimin Evropian dhe NATO.

“Për hir të sigurisë së vendit tonë, ne duhet të merremi me këto grupe që duan të jenë si Wagner që duan të shkaktojnë destabilizimin dhe duhet të fokusohemi në situatën gjeopolitike në të cilën nuk kemi alternativë sepse nuk duam të kanë një alternativë përveç BE-së dhe NATO-s, por ka vende që mendojnë dhe bëjnë diçka tjetër”, tha ai.

I pyetur nëse BE-ja mund ta ndihmojë Kosovën, Kurti ka thënë se beson në dy obligime që dalin prej saj.

“Kemi dy premtime, një nga Von der Leyen për planin e zgjerimit, por kemi edhe premtimin e Charles Michel se viti 2030 është viti kur BE-ja dhe Ballkani Perëndimor do të bashkohen. Ne kemi kohë dhe kemi substancë dhe duhet ta përdorim atë për të hyrë në një rrugë që është e pakthyeshme. Jo të gjitha vendet kanë të njëjtin pasion dhe dëshirë për anëtarësim në BE”, ka thënë Kurti.

Subscribe në YouTube: GAZETA INFOKUSI