Lajme

Kurti e “njeh” kombin kosovar?

Autori: Gazeta inFokus 15:11 | 06 September 2023

Kryeministri Albin Kurti e përmendi aktivizmin e tij në një fjalim të mbajtur në asamblenë “Open Government Partnership” në Estoni dhe duke folur për angazhimin e tij në Kosovë, iu referua si “komb” shtetit që e udhëheq.

“Misioni i OGP-së rezonon me mua personalisht. Si dikush, fillimi i të cilit në politikë, dhe një pjesë thelbësore e jetës sime politike, ka qenë si aktivist, rrugëtimi im nga aktivizmi social te lidershipi institucional ka përforcuar ndikimin e thellë që qytetarët e angazhuar mund ta kenë në formësimin e kursit të kombit tonë”, tha ndër tjerash Kurti, fjalët e të cilit i transmetoi Zyra e Kryeministrit në web-faqen zyrtare.
Politikani që u rrit me imazhin e një aktivisti që do bashkim kombëtar (siç i referohej Lëvizja e tij bashkimit të Kosovës me Shqipërinë), duket sikur ra në grackën një përkufizimi tjetër për kombin, të cilin ai nuk e beson, ose nuk e besonte.

“Nuk besoj se ka komb kosovar. Ekziston vetëm ai shqiptar, që na e ka lënë edhe Skënderbeu”, shprehej Kurti në një rast në vitin 2019, kur një debat për botëkuptimin e sotëm perëndimor mbi kombin e kishte përfshirë shtetin e vogël, më të riun në Europë.

-Advertisement-

Ndërsa lexon fjalimin e kryeministrit të Kosovës, natyrshëm vëmendja ndalet te fjala “nation”, që në shqip përthehet “komb”. A e tha pahiri?

Opozitari që dikur nuk e donte flamurin e shtetit që sot e udhëheq dhe me krenari nuk lëvizte kur në ndonjë rast kërkohej që të pranishmit të ngriheshin në këmbë për ta respektuar himnin e shtetit, sot sillet ndryshe. Tash, edhe kur pyetet për punën e bashkimit kombëtar, Kurti thjesht argumenton se nuk e lejon Kushtetuta e shtetit të Kosovës.