Sport

Kryetari i FC Prishtinës, Remzi Ejupi, ka shprehur mirënjohje të jashtëzakonshme për Qeverinë e Kosovës

Autori: Gazeta inFokus 11:39 | 01 March 2018

Kryetari i FC Prishtinës, Remzi Ejupi, ka shprehur mirënjohje të jashtëzakonshme për Qeverinë e Kosovës, Kryeministrin Ramush Haradinaj, Ministrin e Sportit, Kujtim Gashi dhe gjithë ministrat tjerë që sot votuan për t’ia dhënë FC Prishtinës një parcelë toke që të bëhet me një kompleks sportiv, shkruan infokusi.

“E falënderojmë ministrin Gashi për këtë punë të jashtëzakonshme dhe tepër domethënëse. E falënderojmë shumë kryeministrin Haradinaj, i cili kërkonte punë si kryeministër dhe angazhimi i tij edhe në sport nënkupton se vërtet dëshiron të punojë”, tha Ejupi.

“Ky kompleks sportiv që do të ndërtohet nuk do të jetë vetëm i FC Prishtinës. Ai do t’i shërbej çdo klubi që do të ketë nevojë, Federatës së Futbollit po ashtu, sepse më shumë se ne nuk mund t’i kuptojë askush dikë që ka nevojë apo mungesë të infrastrukturës”, theksoi Ejupi.

-Advertisement-

Ndera, Ministri i Sportit, Kujtim Gashi, i ka përcjell urime FC Prishtinës dhe qytetarëve të kryeqytetit përmes kryetarit të klubit bardh e kaltër, Remzi Ejupi, me rastin e ndarjes së një parcele të tokës nga Qeveria e Kosovës prej 5.6 hektarësh për ndërtimin e një kompleksi sportiv modern me vlerë milionëshe

Në postimin e ministrit Kujtim Gashi në “Facebook” thuhet:

Sot, Qeveria e Republikës së Kosovës aprovoi vendimin për dhënien e autorizimit për klubin e futbollit ‘Prishtina’ që në bashkëpunim me MKRS-në të ndërmarrin veprimet e nevojshme për përgatitjen e dokumentacionit për dhënien në shfrytëzim të pronës publike në Bernicë të Poshtme për klubin e futbollit ‘Prishtina’, ku parashihet të ndërtohet Kompleksi sportiv.

Përmirësimi i kushteve të infrastrukturës sportive në vend, mbetet prioritet i vazhdueshëm i imi si Ministër i Sportit në mënyrë që talentet dhe futbollistët të kenë ambiente të përshtatshme për ushtrimin e aktiviteteve sportive sipas standardeve UEFA-së dhe FIFA-së, andaj dhënia në shfrytëzim e kësaj hapësire do të krijoj kushte për zhvillimin e gjeneratave të reja të cilat do të merren me zhvillimin e sportit.