Lajme

Komisioneri për Zgjerim viziton Tiranën dhe Shkupin

Autori: Gazeta inFokus 07:38 | 15 January 2020

Dy muaj para vendimit për negociatat, eurokomisioneri për Zgjerimin Oliver Varhelyi do të zhvillojë takime zyrtare sot dhe nesër në Shkup dhe Tiranë.

Më 16 janar zyrtari i lartë i BE-së viziton Tiranën, ku pritet të japë porositë e fundit për politikën shqiptare para Samitit të Këshillit Evropian, në të cilin vendet anëtarë do të vendosin nëse Shqipëria e meriton apo jo dritën jeshile për hapjen e negociatave.

Pas takimeve me kryeministrin francez dhe ministrin e Jashtëm holandez, Varhelyi do t’i përcjellë krerëve të shtetit shqiptarë rezervat dhe kërkesat që kanë këto dy vende skeptike ndaj Shqipërisë.

Gjatë vizitës së tij në kryeqytetin shqiptar, zyrtari i lartë i BE-së do të ketë takime me presidentin Ilir Meta, kryeministrin Edi Rama dhe kryetarin e Kuvendit Gramoz Ruçi.

Gjithashtu eurokomisioneri ka lajmëruar takime edhe me përfaqësuesit e opozitës shqiptare, por pa caktuar nëse do të jetë ajo parlamentare apo PD bashkë me aleatët e saj.

Vizita në Tiranë vjen pas takimeve të eurokomisionerit me përfaqësuesit politikë në Maqedoninë e Veriut.

Në fund të marsit, në mbledhjen e Këshillit Evropian pritet të merret vendimi nga shtetet anëtare të unionit në lidhje me negociatat për Tiranën dhe Shkupin.

Varhelyi pas takimeve politike do të vizitojë edhe zonat e prekura nga tërmeti i 26 nëntorit që shkaktoi 51 viktima dhe qindra banesa të shkatërruara.

Të tjera