Prokuroria ka nisur hetimet ndaj Fahredin Shalës, doktor në emergjencë në komunën e Drenasit dhe pronar i Poliklinikës ‘Medikal Center’, pasi po dyshohet se ka operuar në ordinancën e tij private por edhe në të shtetit pa licencë që nga viti 2022.

Këtë për Gazetën Infokus e kanë konfirmuar nga Oda e Mjekëve të cilët kanë deklaruar se Shala ka qenë anëtar i OMK-së deri në fund të vitit 2022 dhe ka poseduar licencën por që pas skadimit të kësaj licence i njëjti nuk ka aplikuar për rilicencim.

“Dr. Fahredin Shala është anëtar i OMK-së, dhe ka poseduar licencën valide Doktor i Mjekësisë deri me datë 21.11.2022. Administrata e OMK-së e ka njoftuar për të kryer procedurën e ri-licencimit 30 ditë para skadimit të të njëjtës, dhe doktori në fjalë deri më sot nuk ka aplikuar për procedurën e ri-licencimit”, thuhet në përgjigjen e zyrës për informim të OMK-së.

Nga Oda e Mjekëve kanë deklaruar se për këtë rast që doktori në fjalë është duke punuar pa licencë janë njoftuar nga Inspektorati Shëndetësor dhe se tashmë kanë nisur hetimet e nevojshme.

“Lidhur me rastin jemi njoftuar nga Inspektorati Shëndetësor i MSH-së, dhe menjëherë pas pranimit të informatës, lënda i është adresuar Prokurorit të OMK-së, për zhvillimin e hetimeve të mëtutjeshme ex officio”, kanë thënë nga OMK për Infokus.

E në lidhje me këtë Gazeta Infokus ka kontaktuar edhe mjekun në fjalë, i cili ka deklaruar se e vetmja arsye pse ai ka vazhduar punën pa licencë ka qenë sepse ka menduar që licenca e tij vlente për 5 vite.

“Unë kam mëndu që ma kanë dhanë për 5 vite, kjo është arsyeja. Se licencimi bëhet çdo 5 vite ajo kish qenë vetëm për tre vite. Nuk jam duke punuar, nuk është e vërtet që jam duke punuar. Nuk kam punuar më prej shtatorit të vitit 2023. Jam në procedurë e sipër për riaplikimit”, ka thënë Fahredin Shala për Infokus.

Ndërsa nga Oda e Mjekëve kanë deklaruar se sapo të kryhen hetimet ndaj tij dhe vërtetimit që ka vepër penale, OMK-ja do të ia paraqesë rastin organeve të drejtësisë.

“Ndërkaq, lidhur me dy pyetjet tjera, deri tani nuk kemi informata, por në rast të konfirmimit të shkeljes me elemente të veprës penale nga ana e Prokurorit të OMK-së, do të informohen edhe organet e rendit”, thuhet në përgjigjen e tyre./Gazeta Infokus/

BKT Kosova dhe Komiteti Olimpik i Kosovës nënshkruajnë vazhdimin e marrëveshjes së sponsorizimit për periudhë 10-vjeçare

Sponsoruar