Lajme

Haradinaj paralajmëron “varrosjen politike” për mbështetësit e korrigjimit të kufirit

Autori: Gazeta inFokus 07:42 | 08 May 2019

Kryeministri Ramush Haradinaj parasheh “varrosjen politike” të të gjithë atyre që e mbështesin korrigjimin e kufirit ndërmjet Kosovës dhe Serbisë, opsion ky i sponsorizuar nga Beogradi zyrtar.

Ai është zotuar se nuk do të lejojë të preket asnjë pjesë e territorit të shtetit nga marrëveshja që mund të mbërrihet me fqinjin verior, shkruan sot “Koha Ditore”.

Haradinaj i ka bërë këto komente pas mbledhjes së Qeverisë.

-Advertisement-

“Ideja e kufijve, e (Aleksandar) Vuçiqit, e (Ivica) Daçiqit e të tjerëve, kushdo qofshin ata, është qe një shekull. Qe një shekull gatuajnë në kuzhina të veta ide për ndarjen e tokave të shqiptarëve”, ka thënë kreu i ekzekutivit. “Është një brez tjetër. Besoj e kanë marrë vesh. S’mund t’i ndajë më askush tokat e shqiptarëve. Ata mund të bëjnë fqinjësi me shqiptarë nëse duan, por nuk mund të luajnë kufij në Ballkan. Ka përfunduar kjo”.

Në fillim të fazës finale të dialogut me Serbinë, që ka nisur një vit më parë, Kosova është përfaqësuar nga presidenti Hashim Thaçi. Pasi qenë zhvilluar dy raunde bisedimesh mes tij dhe presidentit serb, Vuçiq, presidenti Thaçi kishte lansuar idenë për “korrigjim” kufijsh me Serbinë. Kjo shihej si eufemizëm për shkëmbim territoresh.

Subscribe në YouTube: GAZETA INFOKUSI