Lajme

Haradinaj: Anëtarësimi i përshpejtuar i Kosovës në NATO hap jetik për paqe

Autori: Gazeta inFokus 10:23 | 23 October 2024

Kryetari i Aleancës për Ardhmërinë e Kosovës (AAK), Ramush Haradinaj, ka takuar ndihmës asistentin e Sekretarit të Shtetit për Çështje të Evropës dhe Evroazisë, Alexander Kasanof, në Departamentin e Shtetit.

Kreu i AAK-së e ka falenderuar administratën amerikane angazhimin dhe përkushtimin maksimal në mbështetje të Kosovës.

“Në Departamentin Amerikan të Shtetit, në një takim të hapur, përmbajtësor dhe miqësor, diskutuam zhvillimet politike në Kosovë me z. Alexander Kasanof, Ndihmës Asistent i Sekretarit të Shtetit për Çështje të Evropës dhe Evroazisë. Falenderova z. Kasanof, administratën amerikane dhe Ambasadën e SHBA-së në Kosovë për angazhimin dhe përkushtimin maksimal në mbështetje të Kosovës”, ka thënë Haradinaj.

-Advertisement-

Haradinaj ka theksuar nevojën për anëtarësimin e Kosovës në NATO.

“Në këtë takim, theksova nevojën për një kontratë afatgjate që për synim ka anëtarësimin e përshpejtuar të Kosovës në NATO, pasi ky është një hap jetik për garantimin e sigurisë dhe paqes së qëndrueshme në rajon”, është shprehur Haradinaj.

Ai ka theksuar se që nga vitet e ’90-ta, arritjet e Kosovës janë bërë në partneritet të ngushtë me ShBA-të.

“Vlerësova se lidershipi dhe angazhimi amerikan janë të domosdoshme për një marrëveshje strategjike Kosovë-SHBA dhe për përparimin e Kosovës drejt integrimit euro-atlantik. Arritjet e Kosovës, që nga vitet ’90, përfshirë luftën çlirimtare dhe procesin e shtetndërtimit, janë bërë në partneritet të ngushtë me Shtetet e Bashkuara të Amerikës. Edhe anëtarësimi i Kosovës në NATO duhet të jetë një fitore e përbashkët”, ka theksuar Haradinaj.